Көмүс тарбахтаах мындыр иистэнньэҥнэр, уран көрүүлээх маастардар, уустар тигэн-оҥорон, айан таһаарбыт, саха кэрэ дьахтарын дьоһуннаах киэргэлин – дьабака бэргэһэ туһунан былыр-былыргыттан ырыаҕа да ылланара, хоһооҥҥо да хоһуйуллара. Оннук улахан суолта бэриллэрэ.
edersaas.ru
Оттон билигин, аныгы үйэҕэ, дьабака бэргэһэбитин төһө сөпкө тиктэн кэтэбитий? Олоҥхо ыһыаҕа-2019 аны сайын Нам улууһугар ыытылларынан уонна Национальнай художественнай мусуой 90 сылын чэрчитинэн, бэҕэһээ Дьокуускайга, саха дьахтарын үгэс буолбут таҥаһыгар — дьабака бэргэһэҕэ аналлаах научнай-практическай сэминээр буолла.
Бырайыак ааптара – саха норуодунай худуоһунньуга, талааннаах иистэнньэҥ, норуот маастара Анна Зверева. Наукаҕа консультант – филологическай наука доктора Людмила Ефимова.
Манна Намтан, Хаҥаластан, Чурапчыттан, Амматтан, Горнайтан, Тааттаттан, Мэҥэ Хаҥаластан, Дьокуускай куораттан уо.д.а. сирдэртэн норуот маастардара, учууталлар, наука, төрүт култуура, искусство үлэһиттэрэ, мусуой исписэлиистэрэ кыттыыны ыллылар.
Тэрээһин Алгыһынан саҕаланна. Далбар Хотуттар ыалдьыттарын, сахалыы сиэринэн, саламаатынан, алаадьынан, кыынньар кымыһынан айах тутан көрүстүлэр.
Дьабака өйдөбүлүн, суолтатын, дьабака диэн тыл төрдүн, үөскээһинин, дьахтар төбөҕө кэтэр киэргэллэрин, о.д.а. туһунан учуонайдар – ф.н.д. Людмила Ефимова, филос.н.д. Андрей Саввинов, пед.н.к. Галина Попова-Санаайа, культурология кандидаттара Лена Сидорова, Саргылаана Никифорова, ХИФУ ст. преподавателэ Александра Прокопьева кэпсээтилэр. Оттон ХИФУ аспирантката Евдокия Зверева С.А.Зверев-Кыыл Уола “Дьабака ырыата” айымньытын туһунан иһитиннэрии оҥордо.
— Сахалыы таҥастаах дьон киин куораппыт устун сэлэлии хаамсарбыт көрөргө-истэргэ олус кэрэ. Мин онтон олус үөрэбин, киэн туттабын. Ол эрээри, бу аныгы урбанизация уонна атыы-тутуу сайдыытын үйэтигэр диэххэ дуу, омук быһыытынан уратыбытын көрдөрөр таҥаспытын-саппытын тигиигэ ардыгар кэһиилэр баалларын болҕомтолоох дьон өйдөөн көрөр буолуохтаах. Дьабака бэргэһэ биһиэхэ өбүгэлэрбититтэн кэллэҕэ. Саха дьахтарын үгэс буолбут классическай таҥаһыгар дьабака бэргэһэ олус улахан суолталаах. Туох барыта төбөттөн саҕаланар. Туох баарбытын барытын төбөбүт салайар. Дьабака бэргэһэ — бу биһиги үгэспит. Үгэспитин сөпкө тутуһуохтаахпыт. Харыстыахтаахпыт. Ыччаттарбытыгар тиэрдиэхтээхпит. Онон, биһиги бу бастакы кэмпириэнсийэбитин дьабака бэргэһэҕэ аныыбыт, — диэтэ бырайыак ааптара Анна Зверева.
Бу күн Анна Николаевна араас улуустартан түмсүбүт 40-тан тахса иистэнньэҥҥэ дьабаканы тигии туһунан сэһэргээтэ, иис-уус ньымаларын мындырдаан көрдөрдө, бэйэтин баай уопутуттан үллэһиннэ.
Татьяна Маркова, edersaas.ru.
Мария Васильева хаартыскаҕа түһэриилэрэ.