Дьокуускайга А.Е.Кулаковскай аатынан Норуоттар доҕордоһууларын дьиэтигэр Кэбээйи уонна Хаҥалас улуустарын «Дабаан» уонна «Дархан» түмсүүлэрин ыччаттарыгар доҕордоһуу биэчэрэ тэрилиннэ. Сыала-соруга: ыччат күүһүн түмэ тардан сомоҕолоһуннарыы, уопсастыбаннай үлэҕэ-хамнаска көхтөөхтүк кыттыы. Сиһилии аҕыйах ахсааннаах хотугу норуоттар үгэстэрин секторын сүрүннүүр исписэлиис Анастасия Куличкина сырдатта.
—Тэрээһини «Аймулдан» диэн эбээн ыччатын фольклорга ансаамбыла биһиги секторбыт өйөбүлүнэн тэрийдэ. Бу икки улуус 2018 сылга кыттыһан тугу үлэлээбиттэрин билиһиннэрдилэр. Манна сыһыары тутан сырдаттахха, сыл устата уопсастыбаннай бөлөх көхтөөх ыччата гражданскай-патриотическай акциялары тэрийдэ, айылҕаҕа тахсан сынньаныылары, ыччат араас тэрээһиннэригэр кыттыытын иилээн-саҕалаан, тэрийэн ыытта.
Доҕордоһуу биэчэригэр сомоҕолоһууга аналлаах оонньуу-трениннэр, хотугу норуоттар күрэстэрэ тэрилиннилэр. Улуустары билиһиннэриилэр, сырдатыылар болҕомтону тартылар. «Брейн-ринг» билиини-көрүүнү тургутар оонньууга историяҕа, географияҕа, төрөөбүт сирдэригэр-уоттарыгар, үгэскэ сыһыаннаах олус интэриэһинэй ыйытыылар бэрилиннилэр. Ыччаттар бу дьоро киэһэни ыллаан-туойан, үҥкүүлээн киэргэттилэр, — диэтэ.
Биһиги корр., «Саха сирэ» хаһыат
+1
+1
+1
+1
+1
+1
+1