Икки өрөбүл күн устата Дьокуускай куоракка Комсомольскай болуоссакка ыытыллыбыт тыа хаһаайыстыбатын “Ас-үөл-2022” быыстапка-дьаарбаҥката бүгүн түмүктэннэ.
Саха АССР уонна СӨ Тыа хаһаайыстыбатын министиэристибэтин 100 сылларыгар анаммыт үбүлүөйдээх тэрээһин диэх курдук, олус тэрэһиннээхтик, киэҥ далааһыннаахтык ыытыллан, дьон-сэргэ санаатын тапта. Бу үгэс буолбут тэрээһини тэрийээччилэргэ алтыс сылын кыттыһан ыытыһар тыа хаһаайыстыбатын миниистирин солбуйааччы Артем Александров санаатын бу курдук үллэһиннэ:
— Тыа хаһаайыстыбатын табаары оҥрооччулара, пиэрмэрдэрэ, аһынан-үөлүнэн хааччыйааччылар, агрооскуолалар, кэтэх хаһаайыстыбалар — барыта 170 тахса хаһаайыстыба үбүлүөйдээх быыстапка-дьаарбаҥкаҕа кыттан, атыылара хамаҕатык баран, дохуоттарын хаҥатан, үөрэн-көтөн тарҕастылар. Саамай кылаабынайа, биир да хаһаайыстыба сыанатын үрдэппэтэ, онон атыылара үчүгэйдик барда. Тыа хаһаайыстыбатын министиэристибэтин иһинэн үлэлиир Бородууксуйа хаачыстыбатын бигэргэтэр судаарыстыбаннай киин салалтатынан дьүүллүүр хамыыһыйа сайаапка киллэрбит хаһаайыстыбалар бородууксуйаларын эрдэттэн хаачыстыбатын, амтанын үөрэтэн, бүгүн үгүс хаһаайыстыба тустаах номинацияларга бэлиэтэнэн, саҥа сүүрээннэри олоххо киллэрэргэ кынаттанан тарҕаста. Кэрэхсэбиллээҕэ баар, 10-тан тахса саҥа ааттары буллубут. Быйыл кинилэр төһө да аан бастакытын тэрээһиҥҥэ кытынналлар, бэйэлэрэ оҥорон таһаарар бородууксуйаларынан тэрилтэлэрин аатын дорҕоонноохтук ааттаттылар.
Үбүлүөйдээх тэрээһиммитигэр дьоммутугар-сэргэбитигэр утары баран, үлэлиир усулуобуйаларын эмиэ тэрийдибит. Ол курдук, хаһаайыстыбалар үлэлиир миэстэлэрин босхо туран биэрдибит. Дьаарбаҥкаҕа кыттааччылар олус тэрээһиннээхтик кэлэн кыттан, Комсомольскай болуоссакка, төһө да ардахтаах, тымныы күн турдар, икки күн устата олохтоох ас-үөл дэлэйдик тардылынна.
Агро-оскуолалар көхтөөх кыттыыларын бэлиэтиир тоҕоостоох. Түргэнник ситэр салааны уонна сир аһыттан араас барыанньаны, пастиланы, чэйи оҥорон таһаарар буолбуттара — бастыҥ холобур. Оттон оҕуруот аһын туһунан киһи этэ да барбат.
Элбэх племенной сүөһү быыстапкаҕа турбут. Ааттара уонна хаһаайыннара ыйыллыбыт быыстапка сүөһүлэрин үгүс дьон олус сэргии көрдүлэр. Хаһаайыстыбалар атыыр сылгыны элбэҕи аҕалбыттар.
Көтөр арааһа баар. Страус, хаас, кус, куурусса дэлэйэ дьон болҕомтотун тарта. Ордук Марха олохтооҕо Андрей Фурсо түргэнник иитэр салааны бэркэ сайыннара сылдьарыттан сөхтүбүт.
Ити курдук, үбүлүөйдээх тэрээһин олус табылынна, өргө диэри үгүс киһи өйүгэр-санаатыгар сылдьардыы тэриллибитинэн астыннарда.
Елена ПОТОЦКАЯ, «Саха сирэ» хаһыат.
Ааптар хаартыскаҕа түһэриитэ уонна видеоҕа устуута.