Комсомольскай болуоссакка ыытыллыбыт Тыа хаһайыстыбатын үбүлүөйдээх дьаарбаҥка-быыстапкатыгар “Фермер-Ас” бааһынай хаһаайыстыба салайааччыта, урбаанньыт Алексей Герасимов “Бэйэ аһа” диэн эт астан бэйэтин бордууксуйатын оҥорон таһаарар дьоҕус тэрилтэтэ аан бастаан кыттыыны ылла.
Бу хаһаайыстыба туһунан «Саха сирэ» хаһыат чэппиэрдээҕи нүөмэригэр анаан сырдаппыппыт. Дьоруойбут быйылгы дьаарбаҥка-быысттапкаҕа 10 саҥа аат иһигэр дьоһуннаахтык холбоһон, аата дорҕоонноохтук ааттанна. Алексей Герасимов салайар “Фермер-Ас” бааһынай хаһаайыстыбата «Үрдүк хаачыстыбалаах эт аһы оҥорон таһаарыы» номинацияҕа бочуоттаах 1-кы миэстэни ылла!
Алексей Петрович кыыһынаан Кристиналыын уонна уолунаан Тускуллуун икки күнү быһа «Бэйэ аһа» дьоҕус тэрилтэлэрэ оҥорон таһаарар аһын хото атыылаатылар. Ол түмүгэ — 1 миэстэ.
Бу өйдөбүнньүк бэлиэлэрэ уонна кырааматалара тэрилтэ «Кыһыл муннугар» бочуоттаах сиргэ тураллара чахчы.
Дьаарбаҥканы көрө сылдьан уһун-субуй уочараты көрөн чугаһаабытым — хаһыаппыт дьоруойа «Бэйэ аһа» турар эбит. «Бу туох халыҥ уочаратай? Туох атыыланарый?» диэн дьонтон ыйыппыппар, «наһаа минньигэс халбаһыы баар» диэн хоруйдаатылар. Хаһаайыттар атыылаһааччыларыгар боруобалата уурбуттара, көрүөх бэтэрээ өттүгэр бүтэн хаалбыт уонна сонно халыҥ уочарат буола түспүт. Мин устар кэммэр халбаһы номнуо бүппүт этэ.
ВИДЕО
— Халбаһыбыт сэбиэскэй кэмнээҕи рецебинэн оҥоһуллар буолан, дьон тута «ахтыбыт да эбиппит урукку халбаһыбытын» дии түспүттэрэ. Атыылаһааччы амтаны билэр буоллаҕа. Онон мантан инньэ халбаһыбыт уонна кэтилиэппит бастыҥнарынан ааҕыллыбыттарын учуоттаан, бу астарбытын оҥорон таһаарыыны балачча элбэтиэхпит уонна сыл аайы Москваҕа ыытыллар «Көмүс күһүн» быыстапкаҕа кыттарга суоттаныахпыт, — диэн дьаарбаҥка-быыстапка дьоруойунан буолбут Алексей Герасимов санаатын үллэһиннэ.
Дьон «Бэйэ аһын» бордууксуйатын тэрээһин бүтүөр диэри кэлэн атыыластылар.
“Фермер-Ас” бааһынай хаһаайыстыба “Бэйэ аһа” диэн эт астан бэйэтин бордууксуйатын оҥорон таһаарар дьоҕус тэрилтэтигэр өссө да ситиһиилэр бу курдук сиэттиспитинэн кэлэ туралларыгар баҕарабыт!
Елена ПОТОЦКАЯ, «Саха сирэ» хаһыат.