Бүгүн киин куоракка Комсомол болуоссатыгар 8-с төгүлүн ыытыллар үгэс буолбут «Саха сирин балыга-2019″ быыстапка-дьаарбаҥка саҕаланна.
edersaas.ru
Хоту сиртэн кэлбит балыксыттарга анаан күннээх эрээри, тымныы күн-дьыл туран биэрдэ. Бу күнү хоту дойду балыксыттара долгуйа кэтэһэллэр. Тоҕо? Хас да ыйы быһа эрэйдэнэн балыктаабыт балыктарын икки күн иһигэр хамаҕатык батараллар.
СӨ Тыатын хаһаайыстыбатын миниистирин солбуйааччы Прокопий Николаев суолталаах тэрээһин бастакы күнүгэр үгүс киһи сылдьыбытын, балык атыыта хото барбытын туһунан санаатын үллэһиннэ.
— Өлүөнэ, Индигиир, Дьааҥы, Халыма өрүстэрин балыгын хото аҕалбыт 25 хаһаайыстыба бородууксуйатын дьон хамаҕатык атыыласта. Бастакы күҥҥэ 15-20 тонна балык атыыга барда. Балык хаһаайыстыбаларын бэрэстэбиитэллэрэ мустубуттарынан сибээстээн, туһааннаах министиэристибэлэр уонна биэдэмистибэлэлэр, хонтуруоллуур уорганнар, бородууксуйаны батарыыга үлэлэһэр тэрилтэлэр салайааччыларын кытта «төгүрүк остуол» ыыттыбыт. Онно араас боппуруостары тэҥэ олохтоох оҥорон таһаарар бородууксуйа быһыытынан хотуттан кэлэр балыгынан оскуолалары, оҕо саадтарын, балыыһалары толору хааччыйыы туһунан боппуруостары эмиэ ырыттыбыт, — диэн бэлиэтээтэ Прокопий Романович.
Тэрээһин туһунан киин куорат олохтооҕо Матрена Попова санаатын бу курдук үллэһиннэ:
— Мин сыл аайы балык дьаарбаҥкатыгар сылдьабын. Бүгүн 200 солк. Кэбээйи соботун атыыластым. «Минньигэс балык миинэ» диэн аһымал аахсыйаҕа кыттан, 50 cолк. сылаас чыыр балык миинин истим.
Бу аахсыйаттан киирбит үбү элбэх оҕолоох дьиэ кэргэттэргэ түҥэтэллэрин истэн, суолталаах тэрээһиҥҥэ кытынным диэн үөрэн турабын.
Илларион Востриков — Аллараа Халыматааҕы «Походскай» ТХПК салайааччыта. 2017 сыллаахтан эдэр киһи аҕатын хаһаайыстыбатын бэйэтин илиитигэр ылыаҕыттан, балыктааһыныган дьарыктанар.
— Былырыын 50 тонна балыгы ылбытым, тута тоҥорор (шоковая заморозка) сыаҕы туппутум. Онон сайын бултаабыт балыкпытын икки чаас иһигэр брикеттэргэ тоҥоробут.
Сайыҥҥы кэмҥэ 30-чаҕа тиийэр үлэһиттээхпин. Бастайааннай үлэһит — 10 киһи. Сыанабытын тыа хаһаайыстыбатын министиэристибэтэ быспытынан 300-450 солк. атыылыыбыт, — диэн үлэтин-хамнаһын туһунан кэпсиир кэпэрэтиип салайааччыта.
Үөһээ Бүлүүттэн төрүттээх Илья Васильев дьаарбаҥкаттан 2 тыһ. солк хаас атыылаһан иһэрин көрсө түстүм. Кини хас да сыллааҕыта эмиэ маннык дьаарбаҥкаттан хаас атыыласпыт.
— Нэдиэлэттэн ордук сиэбитим. Өр барар ас. Аны ырыынакка кэлэн «бултуубун», — диэн үөрэ-көтө кэпсиир сэһэргэһээччим.
Ити курдук, дьон балык дьаарбаҥкатыгар сылдьан санаалыын көнньүөрдэ, «бултуйда» даҕаны, балык арааһын ылан хаһаанна.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.