Дьокуускайга Хомсомуол болуоссатыгар ааспыт өрөбүл күннэргэ ыытыллыбыт «Саха сирин балыга – 2017» өрөспүүбүлүкэтээҕи дьаарбаҥкаҕа былааны лаппа куоһардылар.
Хотугу улуустартан кэлбит 16 балыксыт хаһаайыстыба уонна киин куоракка баар 4 астыыр-үөллүүр тэрилтэ 50 туонна балыгы атыылаатылар.
Онон, тэрийээччилэр (Арктика дьыалаларыгар судаарыстыбаннай кэмитиэт уонна «Якутская ярмарка» АУо) эрдэ былааннаабыттарыттан икки төгүл элбэх балык атыыга баран, 17 мөл. солкуобай кээмэйдээх үп киирдэ. Икки күн устатыгар, быһа холоон, 5 тыһ. кэриҥэ киһи сырытта.
Кэмитиэт балык хаһаайыстыбатын салаатыгар салайааччыта Прокопий Кириллин иһитиннэрэринэн, Усуйаана Хаһааччыйатыттан кэлбит «Фактория и К» ХЭУо 18 туонна балыгы атыылаан, мөккүөрэ суох, бастакы миэстэни ылары ситистэ. Бу хаһаайыстыба былырыын кэмитиэт бырагырааматынан балык астыыр сыах туттан киллэрбитэ. Онон «хаһааччыйалар» тоҥоруллубут, тууһаммыт, брикеттэммит балык эгэлгэтин атыыга хото таһаардылар.
«Балык ыраахтааҕыта» диэн ким муҥутуур улахан балыктааҕын быһаарсар күрэс балык көрүҥнэринэн ыытыллыбытыгар 24 киилэни үктүүр тууччахтаах «Аллайыаха» община, Усуйаанаттан 9,7 киилэ ыйааһыннаах чыыры бултаабыт «Ярок» община уонна 1,5 киилэлээх собону аҕалбыт «Кэбээйи» ХЭУо (Сангаар бөһ.) кыайыылаахтарынан билинилиннилэр.
Сорох хаһаайыстыбалар сүр-бириистээх кэлэннэр, дьону-сэргэни сэргэхситтилэр, үөртүлэр. Ол курдук, Михаил Сивцев дириэктэрдээх «Булуҥ» МУТ 8 киилэ ыйааһыннаах чыырын дьаарбаҥка саамай кырачаан ыалдьытыгар туттаран ыытта уонна 17 киилэлээх тууччаҕын дьаарбаҥка саамай саастаах көрөөччүтүгэр дьиэтигэр илдьэн биэрдэ.
Прокопий Афанасьевич бэлиэтииринэн, бу сырыыга сайыҥҥы-күһүҥҥү балык атыыта киэҥник тэриллибит буоллаҕына, аны ахсынньы 23-24 күннэригэр Саҥа дьыллааҕы сандалыга анаан муус аннынан бултаммыт балык дьаарбаҥкатын тэрийиэхтэрэ.
Василий НИКИФОРОВ, https://edersaas.ru