«Саха» НКИХ суруналыыһа, суруйааччы, «Сардаана» биэрии ааптара, ыытааччыта Сардаана Сивцева-Даана Сард бастакынан «Саха Өрөспүүбүлүкэтин үтүөлээх суруналыыһа» ааты сүктэ. Сардаана Мигалкина 1965 сыллаахха Уус Алдан улууһун Бороҕонугар төрөөбүтэ. Оскуола кэнниттэн Владивосток куоракка Уһук Илиннээҕи государственнай университет суруналыыстыкаҕа факультетын бүтэрбитэ.
«Саха» национальнай көрдөрөр-иһитиннэрэр компания телевидениетыгар «Сардаана» диэн субуота аайы отучча мүнүүтэ көстөр авторскай биэриилээх. Онно интэриэһинэй дьарыктаах, дьылҕалаах, олоххо ураты көрүүлээх диэбит дьоннорун ыҥырар. Биэриитин геройдарын түмэн 2002 сыллаахха Москваҕа «Жизнь прекрасна» диэн кинигэ таһаартарбыта. Бу кинигэҕэ «Хотугу Форум» Анкоридж куоракка (АХШ) баар офиһыгар Саха сирин бэрэстэбиитэлэ Анастасия Божедонова, «Далбар Хотун» сурунаал редактора Аита Шапошникова, артыыстар Аиза Решетникова уонна Зоя Багынанова, суруналыыс, ырыаһыт Яна Угарова уо.д.а. киирбиттэр.
Үлэтин таһынан икки сыл курдук «Молодежь Якутии» хаһыакка «Сардаана» диэн бэйэтэ анал рубрикалаах этэ. 2006 сыл түмүгэр «Силис» диэн нууччалыы тахсар чааһынай сурунаалга кылаабынай редактор буолбута. Бу сурунаал ис хоһооно – чөл олох, медицина, ыарахан түгэннэртэн кыайыылааҕынан тахсыбыт дьон, төрөөбүт сирдэрин-силистэрин умнубатах дьон уо. д. а.
Даана Сард суруйбут «Ааспыт ааспат амтана» сэһэнинэн теле-сериал уһуллан, билигин иккис чааһа көстө турар.
Анал аат быйыл саҥа олохтоммута. Биллэрин курдук, күн бүгүҥҥэ диэри суруналыыстар “Саха Өрөспүүбүлүкэтин култууратын үтүөлээх үлэһитэ” итиэннэ “Саха Өрөспүүбүлүкэтин норуотун хаһаайыстыбатын үтүөлээх үлэһитэ” бочуоттаах ааттары ылан кэллилэр. Оттон, истэр-билэр курдук, биһиги дойдубутугар “Үтүөлээх учуутал”, “Үтүөлээх быраас”, “Үтүөлээх тутааччы”, “ Үтүөлээх геолог,” “Үтүөлээх юрист”, о.д.а. араас эйгэҕэ туһааннаах идэлэргэ бочуоттаах ааттар бааллар. Урут уруккуттан суруналыыс идэтэ ыарахан, уустук диэн, оннооҕор шахтер идэтиниин тэҥнээн көрөллөрө… Оттон аныгы үйэҕэ суруналыыс идэтэ кутталлаах да буолла диэх кэриҥнээхпит. Итиэннэ айар үлэ диэн хайдаҕын сыһыаннаах дьон бары бэркэ билэн эрдэхтэрэ.
edersaas.ru