Уопсастыба

«Даадар ааҕыылара» өрөспүүбүлүкэ оҕолорун түмтэ

1991 сыллаахха саас Томпо улууһун Кириэс Халдьаайытыгар суруйааччы Ф. Г. Винокуров-Даадар төрөөбүт-үөскээбит, оҕо сааһа ааспыт “Киргиэлэй өтөҕөр (аҕатын аата)” кини аатын үйэтитээри оскуоланы бүтэрээччилэр уонна оскуола кэлэктиибэ сэргэ туруорбуттара.

Сэргэ иннигэр аан бастаан суруйааччы хоһооннорун дорҕоонноохтук аахпыттара. Ол кэнниттэн оскуола оҕолоругар анаан “Даадар ааҕыылара” диэн оскуолатааҕы, онтон 2006 сылтан эрэгийиэннээҕи ааҕыылары тэрийбиттэрэ. Тэрээһин силистэнэн-мутуктанан, быйылгыттан аны өрөспүүбүлүкэтээҕи  тэрээһиҥҥэ тиийэ үүннэ.  Сэбиэскэй сойуус Дьоруойа Федор Охлопков аатынан Кириэс Халдьаайы орто оскуолатын саха тылыгар учуутала Ирина Харайданова “Даадар ааҕыыларын” туһунан бу курдук кэпсиир:

— Суруйааччы Ф.Г. Винокуров-Даадар хоһоонун ааҕыы күрэһигэр Дьааҥы, Усуйаана, Эбээн Бытантай, Өймөкөөн, Усуйаана, Томпо, Кэбээйи, Чурапчы, Алдан, Нам, Сунтаар, Булуҥ, Үөһээ Бүлүү, Бүлүү, Мэҥэ Хаҥалас, Уус Алдан, Амма, Таатта, Мииринэй, Ньурба улуустарыттан уонна  Дьокуускай куораттан көхтөөхтүк  кытыннылар. Сыстыганнаах дьаҥынан сибээстээн, тэрээһини куйаар ситиминэн ыыттыбыт.

Тэйиччиттэн олорон олус күүстээх састааптаах  дьүүллүүр сүбэ үлэлээтэ: РФ үтүөлээх, СӨ норуодунай артыыһа Е.Н. Степанов, СӨ култуура уонна духуобунас сайдыытын министиэристибэтин сүрүн  исписэлииһэ Е. В. Ефимов, Саха академическай драматическэй тыйаатырын артыыһа С. Р. Баланов, Олоҥхо тыйаатырын уонна киинэ артыыһа Е. П. Егоров, СӨ ускуустубатын үтүөлээх үлэһитэ, скульптор В. Я. Сивцев-Отур Силис, СӨ Национальнай бибилэтиэкэтин оҕо ааҕар киинин үлэһиттэрэ А. Д. Яковлева, Васильева Н.Е., СӨ култууратын туйгуна, СӨ худуоһунньуктарын сойууһун чилиэнэ А. А. Бурцева оҕолор ыыппыт хоһооннорун иһиттилэр, сыаналаатылар. Биллэн турар, тэрийээччилэргэ уустук үлэ буолла. Бастатан туран, кыттыан баҕалаах оҕолор сибээстэрэ суох буолан, матырыйаалларын кэмигэр  ыыталларыгар ыарырҕаттылар. Ол да буоллар, оҕо баҕатын учуоттаан, сайаапка биэрбиттэр үлэлэрин биири да хаалларбакка, барытын сыныйан үөрэттибит, иһиттибит.

Даадар хоһоонноругар оҕолорго олус улахан интэриэс үөскээбититтэн олуһун долгуйдубут да, үөрдүбүт да. Ол курдук, алын кылаас бөлөҕөр (1-4 кыл) — 48 үөрэнээччи, обургу оҕо бөлөҕөр ( 5-7 кыл ) — 76 үөрэнээччи, улахан бөлөххө (8-11кыл) -72 үөрэнээччи кытынна. Маны таһынан, учууталлар (17 киһи) актыыбынайдык кыттыбыттарын бэлиэтиир наада.

“Даадар ааҕыыларыгар” сэргэхтик, көхтөөхтүк кыттыбыт оскуолалар үөрэнээччилэригэр, учууталларыгар улахан махталбытын тиэрдэбит. Ордук Кэбээйи улууһун кыттааччыларын тоһоҕолоон бэлиэтиибит. Күндү учууталлар, суруйааччы Даадар аатын үйэтитэр үлэҕитигэр ситиһиилэри баҕарабыт. Бэйиэт Ф.Г. Винокуров-Даадар Кэбээйигэ үлэлээбитин үрдүктүк сыаналыыргытыттан, ытыктабыллаах сыһыаҥҥытыттан уонна утумнаахтык үлэлэһэргититтэн үөрэбит.

“Даадар диэн төрөөбүт үрэҕим

Халаанын уутунан халыйар,

Мин эдэр дьолломмут сүрэҕим

Үөрүүнэн-көтүүнэн умайар”, — диэн суруйааччы Федор Винокуров-Даадар ыччакка эрэлин, айбыта сүппэтин, көлүөнэ солбуга — ыччат өрүү инники буоларын туһунан суруйбута “Даадар ааҕыылара” тэрээһиҥҥэ арылхайдык көһүннэ. Бу улахан сэҥээриини ылбыт тэрээһини кэнэҕэс салгыы ыытыахпыт.

                                                   

 

Елена ПОТОЦКАЯ, “Саха сирэ” хаһыат, edersaas.ru

 

0
0

Добавить комментарий