Бүлүүгэ дьаабылыка саада силигилиэҕэ

Бөлөххө киир:

Бүлүү куоратыгар Учуутал күнүгэр аналлаах нэдиэлэ саҕаланна. Педучилищены 50-с сылларга бүтэрбит выпускниктар, билигин 80-90 саастаах ытык кырдьаҕастар ааттарыттан училище таһыгар дьаабылыка саадын сириэдитээри мастары олортулар.

Бу күргүөмнээх үлэ туһунан Бүлүүтээҕи училище тэрийээччи үлэһитэ Светлана Мытник сырдатта:

— Аҕам саастаах выпускниктар оҕолоро, сиэннэрэ, аймахтара иилээн-саҕалаан, өрөспүүбүлүкэ араас муннугар олорор ытык дьоммут ааттарыттан мастары олортулар. Маны сэргэ, «Хорсун» диэн патриотическэй кулууп устудьуоннара көмөлөстүлэр.

Бу 50-с сылларга бүтэрбит выпускниктар истэригэр РСФСР уонна Саха АССР үтүөлээх учуутала, Аҕа дойду сэриитин кыттыылааҕа, 1943 сыллааҕы выпускник Николай Афанасьев,  өрөспүүбүлүкэ бочуоттаах олохтооҕо, Сэрии кыттыылааҕа, элбэх уордьан кавалера, Саха АССР норуотун хаһаайыстыбатын үтүөлээх үлэһитэ, 1946 сыллааҕы выпускник Кирилл Павлов, өрөспүүбүлүкэ үөрэҕириитин үтүөлээх үлэһитэ, ССРС уонна РСФСР үөрэҕириитин туйгуна Ульяна Тимофеева, ССРС, РСФСР, Саха АССР үтүөлээх тириэнньэрэ, педагогическэй наука хандьыдаата Николай Волков бу училище киэн туттар выпускниктарынан буолаллар.

Кыайыы 80 сылын көрсө ытык дьон сиэннэрэ, оҕолоро олордубут дьаабылыкаларын саада үүнэн силигилээн, хаһан эрэ сэрии ыар сылларыгар училищены бүтэрбит дьон ытык ааттарын санатыа буоллаҕа.

Ульяна Захарова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0