Ил Дархан Айсен Николаев сорудаҕынан, Дьааҥыга халаан уутуттан эмсэҕэлээбит нэһилиэнньэлээх пууннартан оҕолор Дьокуускайга кэллилэр.
Бүгүн 28 оҕо «Юные Якутяне» өрөспүүбүлүкэтээҕи ресурснай киин үлэлэтэр «Связист» лааҕырыгар кэллэ. Манна «Быстрее! Выше! Сильнее!» иккис симиэнэтэ саҕаламмыта.
«Коронавирус дьаҥар бары анаалыстары туттаран, мэдиссиинискэй көрүүнү ааһан баран оҕолору этэрээттэргэ араардыбыт. Оҕолор күҥҥэ биэстэ тото-хана аһыахтара. «Связист» лааҕыр бырагырамаатынан араас хайысхаларга дьарыктаныахтара. Биһиэхэ «Волейбол», «Спортивное ориентирование», уопсай физическэй бэлэмнэнии, «Ума палата», «Аэробика», «Я и право» бырагыраамалара бааллар», — диэн «Юные Якутяне» ресурснай киин методиһа Илья Романов кэпсиир.
Үөрэтэр уонна иитэр бырагырааманы ресурснай киин баһаатайдара оҥоруохтара. Сынньана кэлбит оҕолор Дьокуускай киинэ тыйаатырдарыгар, мусуойдарыгар уонна бассейнҥа сылдьыахтара.
Хаартыска — «Юные Якутяне» ресурснай киинтэн.