Олунньу 14 күнүгэр Дьааҥы улууһугар СӨ ситэриилээх былааһын 2021 сыллааҕы отчуотугар улуус тыа хаһаайыстыбатын сайыннарыыга аналлаах бырагырааманан сөптөөх өйөбүлү ылыаҕа диэн иһитиннэрдилэр.
Ол курдук, быйыл улууска сүөһүнү иитэргэ аналлаах киин тутуллуоҕа, бу сыалга барыта 26 мөл солк. көрүллүөҕэ. Ону тэҥэ, «Саха сүөһүтэ» ГКУ филиала аһыллыаҕа. Ааспыт сыллааҕы отчуоту видео-кэмпириэнсийэ эрэсииминэн РФ Бэрэсидьиэнигэр СӨ бастайааннай бэрэстэбиитэлистибэтин бэрэссэдээтэлэ, СӨ Бырабыыталыстыбатын бэрэссэдээтэлин солбуйааччы Андрей Федотов иһитиннэрдэ.
Отчуот кэнниттэн улуус олохтоохторо, чуолаан оптика утаҕа хаһан кэлэрин ыйыталастылар, кэлэр түгэнигэр интэриниэт хаачыстыбата лаппа тупсуох этэ диэн санааларын этиннилэр. Бу боппуруос өрөспүүбүлүкэ салалтатын үлэтин бэбиэскэтигэр болҕомтоҕо ылылынна. Санатар буоллахха, былырыын Баатаҕайга IT-киин үлэҕэ киирбитэ, инникитин түргэн интэриниэт үлэтигэр бу инфраструктура көдьүүстээх буолуоҕа.
Отчуот мунньаҕын түмүгүнэн олохтоохтор этиилэрэ боротокуолга киллэриллиэҕэ уонна бу туолуутун хонтуруоллуур оробуочай бөлөх тэриллиэҕэ. Бөлөх кыбаартал аайы туох үлэ ыытыллыбын бэрэбиэркэлиэҕэ. «Мин санаабар, маннык быраактыка туһаныллара көдьүүстээх эрэ буолуоҕа. Бырабыыталыстыба уонна нэһилиэнньэ бииргэ үлэлииллэригэр улахан көмөнү оҥоруоҕа», – диэн Андрей Федотов санаатын үллэһиннэ.
Кэлиҥҥи кэмҥэ олохтоохтор Дьааҥы улууһугар элбэх үлэ ыытылларын эттилэр. Ол курдук, Саха сиринээҕи уонна Арассыыйатааҕы бырагыраамалар көмөлөрүнэн улууска социальнай эбийиэктэр, саҥа дьиэлэр тутуллуулара быдан элбээбит.
«Биир дойдулаахтарбын кытта инникини түстүүр аналлаах истиҥ кэпсэтии буолла. Улуустара сайдарын туһугар сөптөөх этиилэрин, баҕа санааларын аһаҕастык ыйдылар. Буола турар балаһыанньаны барытын өйдүүллэр, инники өттүгэр эрэллээхтэр», – диэн отчуоттуур бөлөх салайааччыта Андрей Федотов санаатын үллэстэр. Санатар буоллахха, ситэриилээх былаас отчуота Саха сиригэр 1998 сылтан ыытыллар.