Дьааҥылар көһө сылдьар мобильнай мэдиссиинискэй комплексынан хааччыллыахтара
Бүгүн, олунньу 12 күнүгэр, «Саха» НКИХ, «Якутия24» телеханаалларынан СӨ ситэриилээх былааһын отчуотун бырабыыталыстыба бэрэссэдээтэлин солбуйааччы Ольга Балабкина оҥордо.
Отчуокка үлэ уонна социальнай сайдыы миниистирэ Елена Волкова, доруобуйа харыстабылын миниистирэ Елена Афанасьева уонна да атын салаа биэдэмистибэлэр салайааччылара кытыннылар. Вице-премьер өрөспүүбүлүкэ бырабыыталыстыбатын социальнай салааҕа ааспыт сыллааҕы үлэтин сүрүн түгэннэрин билиһиннэрдэ.
— Ааспыт сылга өрөспүүбүлүкэҕэ 12039 оҕо төрөөтө. Өрөспүүбүлүкэ Уһук Илин уонна Россия Федерациятын эрэгийиэннэрин ортотугар демография көрдөрүүлэринэн инники кэккэҕэ сылдьар, — диэн Ольга Балабкина бэлиэтээн эттэ.
Кэнники үс сыл иһигэр оҕолоох дьиэ кэргэттэри өйүүргэ көрүллэр үп кээмэйэ 4 төгүл үрдээтэ: 2018 сылга – 3,5 млрд солкуобай, оттон 2021 сылга 14,5 млрд солкуобай көрүллүбүтэ.
Балтараа чаастан ордук буолбут отчуокка үгүс ыйытыы киирдэ. Өрөспүүбүлүкэ олохтоохторуттан доруобуйа харыстабылын, социальнай төлөбүрдэр тула ыйытыылар киирдилэр.
Холобур, Дьааҥы улууһун олохтооҕо оройуоннааҕы киин балыыһа тутуллан, үгүс киһи абыранна диэн бырабыыталыстыбаҕа махталын тириэртэ итиэннэ көһө сылдьар мобильнай мэдиссиинискэй комплекс хаһан улууска кэлиэҕин туоһуласта.
Онуоха доруобуйа харыстабылын миниистирэ Елена Афанасьева:
— Былырыын 100-чэкэ киһилээх ыраах сытар нэһилиэнньэлээх пууннар олохтоохторугар диспансеризацияны ыытарга анаан 14 “КАМАЗ” массыынаҕа холбоммут көһө сылдьар комплекс атыылаһыллыбыта. Быйыл Дьааҥы улууһугар маннык көһө сылдьар комплексы эмиэ тириэрдиэхпит. Итиэннэ маннык массыыналарынан ленскэйдэр уонна уус маайалар хааччыллыахтара, — диэн быһааран эттэ.
Санатан эттэххэ, былырыын Дьааҥы Баатаҕайыгар нэһилиэнньэ өр күүппүт эбийиэгэ – 30 сытар миэстэлээх терапия уонна оҕоҕо туһуламмыт салаалардаах, симиэнэҕэ 180 киһи сылдьар поликлиникалаах балыыһа комплекса үлэҕэ киллэриллибитэ.
Салгыы элбэх оҕолоох ыал ийэтэ Лилия социальнай хантараак туһунан ыйытыыны биэрдэ. Бу ыйытыыга үлэ уонна социальнай сайдыы миниистирэ Елена Волкова:
— Социальнай хантараак уонтан тахса сыллааҕыта киирбитэ. Бэйэ дьыалатын тэриниигэ, тус хаһаайыстыба хайысхатын сайыннарарга көмөлөһөр, итиэннэ ыарахан балаһыанньаҕа түбэспит дьиэ кэргэҥҥэ социальнай хантараак быһыытынан өйөбүл оҥоһуллар. Тус көмө хаһаайыстыбаны сайыннарыыга көмө суумата быйыл икки төгүл үрдүөҕэ, — диэтэ.
Социальнай хантараакка олоҕуран судаарыстыбаннай социальнай көмөнү оҥорууга ыытыллар үп кээмэйэ 2 төгүл улаатта. Кыра дохуоттаах 5 тыһыынчаттан тахса ыал 500 мөлүйүөнтэн тахса солкуобай суумалаах көмөнү ылла. Үлэ көрдөнүүгэ көмө кээмэйэ ортотунан 51,4 тыһ. солкуобай, урбаанынан дьарыктаныыга – 250,0 тыһ. солкуобай, кэтэх хаһаайыстыбаны сайыннарыыга – 100,0 тыһ. солкуобай, олохторугар көрсүбүт уустук быһыыны-майгыны туоруурга – 55,0 тыһ. солкуобай буолла.
Коронавируһунан сибээстээн СӨ ситэриилээх былааһын отчуота номнуо иккис сылын онлайн киэбинэн ыытыллар. Ол курдук, бырабыыталыстыба чилиэннэрэ хас субуота, өрөбүл ахсын тэлэбиидэнньэнэн отчуоту ыыталлар. Маны таһынан сыһыарыллыбыт улуустарынан зуумунан күннэтэ отчуоттууллар.
edersaas.ru