Дьааңы сирэ тымныытынан, ураты тыыннаах таастарынан, чыыбааҕы сылгытынан, куобаҕынан уонна талааннаах, көхтөөх ыччатынан биллэр. Сиринэн, халлаанынан айаннаах элбэх сырыылаах улуус.
Бу ыйга Дьокуускай туонатыгар, Өкөскүлээх Өлөксөй аатынан Норуоттар доҕордоһууларын дьиэтигэр «Дьааңыга-Ылааҥыга» диэн ааттаах улахан тэрээһин буолан ааста.
Дьааңы улууһун култуурата бу тэрээһин сүрэҕинэн-тирэҕинэн буолла. Ол курдук, икки массыынанан үс күн айаннаан кэлээт, бэйиэт Христофор Горохов-Элгэстэй 80 сааһын туолар өрөгөйүгэр кытыннылар уонна «Дьааңыга-Ылааңыга» бырайыак кэнсиэрин тэрийистилэр. Дьокуускайга үөрэнэр устудьуоннарга уонна Дьааңы ыччатыгар көрөөччүлэр иһирэх махталларын биллэрэн, уҕараабат ытыс тыаһынан арыаллаатылар.
Бииртэн биир кэрэ куоластаах ырыаһыттар, үңкүү кэлэктииптэрэ кыттан, тэрээһин үрдүк таһымнаахтык ааста. Ол курдук, Дьааңы куоратыттан төрүттээх талааннаах кыыспыт Мария Васильева устудьуон ыччаты муһа охсон, «Остановка Батагай» (Р.Чирикова тылларыгар, мелодиятыгар), «Верхоянский тост» (Н.Глазков, И.Кысылбаикова мелодиятыгар) бэртээхэй үңкүүлэри туруорда. Куораттааҕы искусство
оскуолатын үөрэнээччилэрин «Премьера» үңкүү ансаамбыла (сал. Ангелина Янкова) үңкүүлэри туруорда. Маны таһынан, Д.А.Томская-Чайка «Үчүгэй Үөдүйээн, куһаҕан Ходьугур» олоңхотунан «Маски» оҕо ансаамбыла үҥкүү туруоран, биһирэбили ылла. Дьааңыттан тардыылаах, Суорун Омоллоон аатынан Опера тыйаатырын артыыһа Олег Беляев, эстрада ырыаһыта Олимпия кытыннылар.
Оттон «Эчий» литературнай түмсүү чилиэннэрэ «Бичик» кинигэ кыһатын үлэһиттэрин кытта көрүстүлэр. «Бичиктэр» хас биирдии киһиэхэ сүбэ-ама биэрдилэр.
Раиса ЧИРИКОВА, “Саха сирэ” хаһыат, edersaas.ru