Бу сайыҥҥыттан Дьааҥыга ойуур баһаардара турдулар. Улуус баһылыга Гаврил Чириков ол туһунан маннык кэпсиир:
— От ыйын 31 күнүнээҕи туругунан, Дьааҥыга 386205 га сиргэ уот туран, 26 буруо тахсар сирэ бэлиэтэннэ. 238423,0 га сиргэ 7 ойуур баһаара турда. Уоту умуруорарга 56 киһи, 10 тиэхиньикэ үлэлиир.
Эҥэ нэһилиэгэр 5 ойуур баһаара бэлиэтэннэ, Оһохтоох нэһилиэгэр диэри 4,9 килэмиэтир, Сайдыыга диэри 15,07 килэмиэтир.
Чөрүмчү нэһилиэгин диэки 3 ойуур баһаара турда, нэһилиэккэ диэри 8 килэмиэтир.
Баатаҕайтан 19,7 килэмиэтирдээх сиргэ тахсыбыт баһаар бөһүөлэк диэки баран иһэр. Бөтөҥкөс айан суолугар Баатаҕай үрэҕэр уонна Алыһардаах суолугар диэри уоту тохтотор балаһа оҥоһулунна. Тыал күүһүрдэҕинэ, нэһилиэнньэлээх пууҥҥа куттал үөскүөн сөп эрээри, билиҥҥитэ этэҥҥэ, уот бөһүөлэккэ суоһаабат.
Ону таһынан, Остуолба нэһилиэгиттэн 9 килэмиэтирдээх сиргэ 2310,0 га сиргэ уонна Дулҕалаах диэки 53,0 га сиргэ уот турда.
Күн бүгүн нэһилиэктэргэ куттал суоһаабат.
Марианна Тыртыкова, «Саха сирэ» хаһыат, edersaas.ru