Дьааҥы оройуонугар өссө икки туонна гуманитарнай көмөнү тиэртилэр.
Оройуон киинигэр Баатаҕайга, от ыйын 13 күнүгэр, Дьокуускайтан эбии гуманитарнай көмө ыытыллыбыта. Якутоптторг ыыппыт икки туонна аһын-үөлүн «Полярные авиалинии» Ан-26 салгын аала тиэртэ.
—Биһиги оройуон сайаапкатынан социальнай суолталаах аһы-үөлү ыыттыбыт. Бурдук, саахар, гречкэ, рис куруппалара, тушенка, мас арыыта, мокоруон арааһа, чэй, сгущенка, — диэн Якутоптторг генеральнай дириэктэрин бастакы солбуйааччы Сайдам Степанов иһитиннэрэр.
Салгын аала төннөрүгэр нэһилиэктэртэн мустубут оҕолору илдьэ кэллэ.
Санатан эттэххэ, бу иннинэ, Баатаҕайга халаантан эмсэҕэлээбиттэргэ эмиэ 2 туонна 253 кг ас-үөл тиэрдиллибитэ, ол иһигэр Якутоптторг лиинийэтинэн — 1 тонна 800 кг таһаҕас. Өссө эрдэ Якутоптторг филиалыттан Баатаҕайга 1,8 туонна ас-үөл тиийэн турар.
Ити курдук, СӨ Бырабыыталыстыбатын сорудаҕын толорон, бүгүҥҥү күн туругунан, тэрилтэ ас-үөл саппааһыттан Дьааҥы оройуонун нэһилиэнньэлээх пууннарыгар 5 туонна 600 кг аһылыгы ыытта.
От ыйын 14 күнүгэр, Дьокуускай аэропордугар номнуо тиэйиллибит өссө 2 туонна ас-үөл ыытыллара былааннанар.
+1
+1
+1
+1
+1
+1
+1