«Култуура” национальнай бырайыак чэрчитинэн Дьааҥы улууһугар модельнай бибилэтиэкэ аһылынна. Ол курдук “Култуурунай эйгэ” диэн эрэгийиэннээҕи бырайыак чэрчитинэн бу сылга биир бастакынан аһыллыбыт бибилэтиэкэ буолар.
Бу туһунан СӨ култууратын уонна духуобунай сайдыытын миниистирин бастакы солбуйааччы Владислав Левочкин сырдатта:
— “Култуура” национальнай бырайыак чэрчитинэн саҥа көмпүүтэринэй тиэхиньикэ уонна оборудование кэллэ. Онон Дьааҥы олохтоохторугар анаан араас өҥө барыта оҥоһуллар буолуоҕа. Ол курдук «Госуслуги”, “Уһук Илиҥҥи гектар”, 3НДФЛ, “Росгосстрах” өҥөлөрү нэһилиэнньэ хото туһаныаҕа. Ону сэргэ, манна аудио, видео монтаж оҥотторуохха сөп, хаартыска бэчээттэтиэххэ уонна хаартыскаҕа түһэрии өҥөтө кытта баар буолуоҕа. Маны сэргэ бибилэтиэкэҕэ саҥа ааннар турдулар, линолеум тэлгэннэ, миэбэл саҥардылынна. Бэлиэтээн эттэххэ, бу миэбэли, малы-салы барытын кыһыҥҥы суол баарына тиэрдиллибитэ.
Дьааҥы улууһун бибилэтиэкэтэ модельнай бибилэтиэкэлэр ахсааннарыгар киирэригэр “Култуурунай эйгэ” бырайыак уонна “Култуура” диэн национальнай бырайыак чэрчитинэн ааспыт сыл ахсынньытыгар куонкуруһу ааспыта. Бибилэтиэкэни саҥардыыга өрөспүүбүлүкэ бүдьүөтүттэн 1 326 мөлүйүөн солкуобай көрүллүбүт. Итинтэн 26,5 тыһыынча солкуобайы улуус дьаһалтата үбүлээбит.
СӨ Култууратын уонна духуобунай сайдыытын министиэристибэтин пресс-сулууспатын хартыскалара туһанылыннылар.
Ульяна ЗАХАРОВА.