Уопсастыба

Дьааҥыга миниистир сылдьыбыт күнүгэр төрөөбүт ньирэй “Генофонда” диэн ааттанна



Бу күннэргэ тус хоту сытар Эбээн Бытантай уонна Дьааҥы улуустарыгар Тыа хаһаайыстыбатын министиэристибэтин улахан бөлөҕө үлэлээтэ.

edersaas.ru

Ол курдук, миниистир Александр Атласов, ”Саха сүөһүтэ” хааһына генофонднай тэрилтэтин дириэктэрэ, АККОР бэрэсидьиэнэ Александр Артемьев, Бэтэринээрийэ департаменын иниспиэктэрэ Артем Бурцев уонна “Сахаагроплем” сүрүннүүр зоотехнига Семен Заровняев тыа хаһаайыстыбатын эбийиэктэрин көрөр уонна үлэни-хамнаһы билсэр соруктаах сырыттылар.


Эбээн Бытантай улууһун очуос таас хайаларын быыһыгар бүгэн, атын боруодалары кытта буккуспакка, ыраас хаанын сүтэрбэтэх саха сүөһүтүн иитэн олорор «Бытантай» генофонда хаһаайыстыбатын Саккырыырга баар пиэрмэтин сүөһүлэрэ мөлтөх хаачыстыбалаах оту сиэннэр, туруктара соччото суох эбит. Миниистир тустаах үлэһиттэргэ сүбэ, дьаһал биэрдэ, 3 туонна эбиэһи, тууһу уонна Чурапчыттан 50 туонна оту тиэнэн илдьии боппуруостарын быһаарда.


Кустуур пиэрмэтигэр эмиэ оту тиэйии боппуруоһа сытыытык турар эбит. “Бытантай” хаһаайыстыба “Саха сүөһүтэ” хааһына тэрилтэтигэр сыһыарыллыахтааҕынан ол тула киэҥ кэпсэтии барда, Александр Артемьев бэйэтин санаатын, көрүүлэрин эттэ. Бастатан туран, мелиорация үлэтин күүскэ ыытар соругу туруорда. Хас да оттуур сирдэри көрөн, хайдах былааннаах үлэ барыахтааҕын эттэ. Маны таһынан оттооһуҥҥа пресс-подборщигы көдьүүстээхтик туһанар наадатын бэлиэтээтэ. Ол курдук, ааспыт сайын пресс-подборщигы сыыһа үлэлэтэннэр, технологиятын сатаан таба тайаммаккалар, улахан алҕас тахсыбыт — от сытыйбыт. Итини таһынан хаһаайыстыбаҕа племенной үлэни тэрийэр зоотехник хайаан да баар буолуохтааҕын, племенной үлэ барыахтааҕын бэлиэтээтэ уонна баар алҕастары туоратарга кэлэр өттүгэр күүскэ үлэлииргэ сорудахтаата.


Дьааҥы куоратыгар “Тымныы оройо” ТХПК бэрт тэрээһиннээхтик дьаһанан үлэлии олорор. Хаһаайыстыба салайааччыта Екатерина Портнягина күннээҕи үлэни-хамнаһы билиһиннэрдэ. Кэпэрэтиип бэйэтин иһинэн тэриммит «Алгыс» диэн хаһаайыстыбатын пиэрмэтигэр кыстык этэҥҥэ, үлэ былаан быһыытынан баран иһэр, Чурапчыттан олус үчүгэй хаачыстыбалаах от кэлбит. Кырдьык, сүөһүлэр туруктара куһаҕана суох. Хаһаайыстыбаҕа бу күннэргэ икки ньирэй күн сирин көрбүт. Күн бэҕэһээ төрөөбүт ньирэйи пиэрмэ үлэһиттэрэ «Генофонда» диэн ааттаатылар.


Екатерина Алексеевна салгыы кэпэрэтиип астыыр сыаҕын көрдөрдө. Манна үрүҥ ас уонна эт ас арааһын оҥороннор, улуус кииинигэр, Баатаҕай бөһүөлэгэр, киллэрэн атыылыыллар. Ыыһаммыт эт атыыга хамаҕатык барар, дьон үөрэнэн наадыйар буолбут.  Уопсай түмүгүнэн хаһаайыстыба үлэтэ-хамнаһа этэҥҥэ диэн сыаналаммытын министиэристибэ пресс-киинэ иһитиннэрдэ.

 

Хаартыска: Тыа хаһаайыстыбатын министиэристибэтэ.

Раиса Сибирякова, «Саха сирэ» хаһыат, edersaas.ru

0
0

Санааҕын суруй