Дьааҥыга Чурапчыттан 38 туонна от тиийдэ

Ааптар: 
Бөлөххө киир:

„Тымныы полюһа“ кэпэрэтиип иһинэн тэриллибит „Алгыс“ кэпэрэтиип 224 сүөһүнү, ол иһигэр 100 ыанар ынаҕы кыстатан турар.

edersaas.ru.
Ааспыт сайын кураантан тэптэрэн уонна ойуур баһаардарыттан сылтаан, кэпэрэтиип 200 эрэ туонна оту хааччыммыта. Онон бу күннэргэ чааһынай дьонтон от атыылаһан олорор. Бырабыыталыстыба от тиэйиитигэр үп көрбүтэ эрээри, харчы хамсыы илик кэмэ буолан, оту билигин иэс тиэйтэрдэххэ эрэ табыллар. Ити иһин кэпэрэтиип салайааччыта Екатерина Портнягина билэр суоппардарын, Чурапчы уолаттарын, кытары иэс тиэйэргэ кэпсэппитин түмүгэр тохсунньу 27-28 күннэригэр үс массыынан 37,8 туонна от тиийдэ. Онон хаһаайыстыба үлэһиттэрэ тымныыны, ырааҕы аахсыбакка айаннаабыт суоппардарга: Дмитрий Хоютановка, Иван Туласыновка, Егор Потаповка итиэннэ отун иэс биэрбит Чурапчы олохтооҕор Егор Лукиҥҥа махтаналлар. Бу ыарахан күннэргэ олохтоох бэйэлэрин уоллара Иннокентий Горохов күн ахсын Остуолбаттан, Мачахтан от-мас тиэйэн абыраабыт. Билигин Эдуард Макаров үс массыыната айаннаан иһэр. Ити курдук кэпэрэтиипкэ барыта 200 туонна от тиэйиллиэхтээх.
— Инникитин да бэйэ-бэйэҕэ үтүө сыһыан үксүү турдун, киһи киһиэхэ итэҕэйэрэ саамай улахан эрэл, ыарахан кэмҥэ киһини киһи эрэ абырыыр. Онон сиэрдээх сыһыан үксүү турдун, — диир Екатерина Портнягина диэн Дьааҥыттан биллэрэллэр.

Раиса Сибирякова, «Саха сирэ» хаһыат, edersaas.ru.

+1
0
+1
0
+1
0
+1
0
+1
0
+1
0
+1
0