Бэҕэһээ, атырдьах ыйын 8 күнүгэр, РФ ЫБММ Ми-26 бөртөлүөтэ халаантан эмсэҕэлээбит Дьааҥы оройуонугар, чөлүгэр түһэрии үлэтигэр анаан тоҕус туонна матырыйаалы тиэртэ.
Оройуон киинигэр, Баатаҕайга, Дьокуускайтан салгын аалынан ОДьКХ матырыйааллара — хочуолунайга турбалар, дьиэни сылытарга туттуллар, о.д.а. матырыйааллар тиэрдиллибиттэр. Бөртөлүөт аара Суордаахха тохтоон, суолу-ииһи чөлүгэр түһэрэр үлэҕэ туттуллар матырыйааллары хаалларбыт.
СӨ нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин бастакы солбуйааччы Иннокентий Андросов бэлиэтээбитинэн, бөртөлүөт эрдэ көтүөхтээҕин күн-дьыл туруга мэһэйдээбит.
Иккис рейс бүгүн былааннанар. Бу сырыыга 13,5 туонна тутуу матырыйаалын, цемент, буруус, о.д.а. илдьиэхтээх.
Уопсайа Ми-26 бөртөлүөт уонна кырыныахтаах. Билигин тоҕус туонна тиэрдиллибит буоллаҕына, ону таһынан өссө, Дьааҥы оройуонун нэһилиэнньэлээх пууннарыгар социальнай эбийиэктэри, биэссэр-акушер пууннарын, оскуолалары, уһуйааннары чөлүгэр түһэриигэ 90,3 туонна араас матырыйааллар тиийиэхтээх.
Санатан эттэххэ, РФ бэрэсидьиэнигэр Уһук Илиҥҥэ федеральнай уокурук боломуочуйалааҕа Юрий Трутнев чөлүгэр түһэрии үлэтигэр РФ ЫБММ эрэгийиэҥҥэ матырыйааллары тиэрдиигэ көмөлөһөрүгэр соруйбута. СӨ Ил Дархана Айсен Николаев сайаапкатынан, от ыйын 19 күнүгэр Саха сиригэр элбэх сыалга-сорукка туһаныллар Ми-26 бөртөлүөт кэлбитэ.