Дьааҥыга 90 киһилээх аэромобильнай бөлөх көмөҕө тиийэргэ бэлэм

Аһара ардаабытын түмүгэр, Дьааҥы өрүс халааннаан Дьааҥы куорат намтал учаастактара ууга былдьаннылар. Билиҥҥи туругунан, Дьааҥы куорат аттынан уу таһыма 1077 см, киритиичэскэй таһым 1020 см эбит. Онон барыта 92 кэтэх дьиэни уу ылла. Санатар буоллахха, куоракка кутуу суолу күүстээх уу кэлэн тоҕу анньан, Дьааҥыга киирбитэ.

Нэһилиэнньэҕэ көмөнү оҥоро РФ Ыксаллаах быһыыга-майгыга министиэристибэтин Саха сиринээҕи управлениетын суһал бөлөҕө кэлбитэ. Быыһааччылар гуманитарнай көмөнү (бородуукта, ас-үөл) уонна ыраас иһэр ууну тиэртилэр. Оҕолору уонна саастаах дьону атын сиргэ көһөрө сылдьаллар. Саха сиринээҕи УГМС иһитиннэрэринэн,  Баатаҕайга уонна Сайдыыга кэлэр икки хонук устатыгар уу таһыма оннунан хаалыаҕа. Оттон Дьааҥы куорат аттынан кэлэр сууккаҕа ардахтан халаан уута кэлиитэ тохтуо суоҕа.

Онон сибээстээн, Дьааҥы улууһугар РФ Ыксаллаах быһыыга-майгыга министиэристибэтин Саха сиринээҕи управлениетын 90 киһилээх аэромобильнай бөлөҕө көмө кэлэргэ бэлэмин туһунан РФ  Ыксаллаах быһыыга-майгыга министиэристибэтин Саха сиринээҕи  управлениетын начаалынньыга, генерал-майор Павел Гарин иһитиннэрдэ.

Павел Гарин, РФ Ыксаллаах быһыыга-майгыга министиэристибэтин Саха сиринээҕи  управлениетын начаалынньыга: 

— Дьокуускай куоракка 90 киһилээх аэромобильнай бөлөх Дьааҥыга көмөҕө барарга бэлэм. Билигин быыһыыр сулууспа исписэлиистэрэ Дьааҥы куоракка ууну тутар быһыты оҥоро сылдьаллар. Бүгүҥҥү туругунан икки нэһилиэк ууттан босхолонно.

Салгыы Павел Гарин иһитиннэриитин истиҥ.