Бэҕэһээ, олунньу 15 күнүгэр, Москваҕа Арассыыйа аармыйатын тыйаатырыгар «Төлөннөөх сүрэх» диэн анал бириэмийэни туттарыы буолла.
«Төлөннөөх сүрэх» диэн Бүтүн Россиятааҕы анал бириэмийэнэн ыксаллаах түгэннэргэ хорсун быһыыны көрдөрбүт, хантан да ыйыыта-кэрдиитэ суох бэйэлэрин ис сүрэхтэриттэн үтүө дьыаланы оҥорбут оҕолор бэлиэтэнэллэр. Быйыл Арассыыйа бары регионуттан бу бочуоттаах наҕараадаҕа 150 оҕо тигистэ. Онно Саха сириттэн 3 оҕо кыттыыны ылла. Дьокуускай куораттан — Харысхан Хобров, Бүлүүттэн — Конон Спиридонов, Дьааҥыттан — Александр Чириков.
Дьааҥы улууһун Баатаҕай орто оскуолатын 11-с кылааһын үөрэнээччитин холобура хорсун быһыы категориятыгар киирбэт эрээри, олоххо олус туһалаах дьыалаҕа ылсан үлэлээн эрэрэ атыттарга, кырдьык да, бастыҥ холобур. Александр Чириков былырыын 10-с кылааска үөрэнэ сылдьан, «Синема» диэн куруһуок тэрийбит. Онно кини интэриэстээх 18 оҕону мунньан, киинэни устарга, таҥарга үөрэппит. Оҕолор Александр салайыытынан оскуола олоҕуттан устан киинэ оҥорор буолбуттар. Бу айар бөлөх үлэтин Баатаҕай бөһүөлэгин дьаһалтата сэҥээрбит.
— Биһиэхэ биэрбит хосторун өрөмүөннээн айар устуудьуйа оҥостубуппут. Үлэбитин интэриэһиргээн, оҕо бөҕө суруттаран барбыта. Билигин «Синемаҕа» 28 оҕо дьарыктанар. Оскуолабытын сэргэ бөһүөлэкпит олоҕун устабыт, араас социальнай роликтары оҥоробут, — диэн кэпсиир Саша.
Александр Чириков айар устуудьуйатыгар биир оскуолаҕа үөрэнэр оҕолор айар үлэ алыбар ылларан, үтүө сабыдыалга куустаран күн бокуойа суох сылдьаллар эбит. «Төлөннөөх сүрэх» бириэмийэни тэрийэр хамыыһыйа киирбит докумуоннары көрөн баран. Александр Чириков бу үтүө дьыалатын болҕомтоҕо ылбыт.
Александр Чириков Арассыыйа бары регионнарыттан кэлбит оҕолору кытта үрдүк трибунаттан үрдүк наҕарааданы тутта. Маннык чиэскэ тиксибит хас биирдии оҕо «Төлөөннөөх сүрэх» диэн Бочуоттаах кинигэҕэ үйэтитилиннэ.
Манна бириэмийэнэн бэлиэтэммит хас биирдии оҕо туһунан сүрдээх иһирэх ахтыы сурулунна.
Ол курдук, Дьокуускайтан сылдьар 11 саастаах Харысхан Хобров ууга тимирэн эрэр оҕону быыһаан, бу кинигэҕэ эмиэ киирдэ.
Бүлүү куоратыттан сылдьар Конон Спиридонов умайа турар дьиэттэн түөрт оҕону быыһаан, эмиэ «Төлөөннөөх сүрэх» бириэмийэтин ылла.
Быйыл «Төлөннөөх сүрэх» түөскэ кэтэр бочуоттаах бэлиэни бэһис сылын туттараллар. Үбүлүөйдээх сылга бу кэм устата 690 оҕо бу наҕарааданы ылбытын бэлиэтээн эттилэр.
— Бүтүн сойуустааҕы»Төлөннөөх сүрэх» уопсастыбаннай бириэмиэйэни РФ судаарыстыбаннай социальнай-култуурунай көҕүлээһин пуондата 2013 сыллаахха олохтообута. Биһиги оҕолорбут хорсун быһыыларын, үтүө санааттан оҥорор дьыалаларын дьоҥҥо-сэргэҕэ биллэрэн, кинилэр холобурдарыгар төрөөбүт дойдуга тапталга, бэриниилээх буолууга үүнэр көлүөнэни иитэбит, — диэн бэлиэтээтэ «Төлөөннөөх сүрэх» бириэмийэ тэрийэр кэмитиэтин бэрэссэдээтэлэ, Бүтүн сойуустааҕы уопсастыбаннай социальнай-култуурунай көҕүлээһин пуондатын салайааччыта Светлана Медведева.
Бочуоттаах бэлиэ хаһаайына Александр Чириков: «Бу мин табаарыстарбын кытта үлэм үрдүк сыанабыла. Олоҕум хаһан да умнуллубат күнэ. Маннык үөрүүлээх түгэннэр элбии туруохтарын баҕарабын!», — диэн санаатын үллэһиннэ.
Саха сирин оскуолаларыгар Александр Чириков курдук үтүө дьыаланы көҕүлүүр оҕолор үгүстэрэ чахчы. Онон учууталлар, эбии үөрэхтээһин тэрилтэлэрин салайааччылара, дьааҥылар холобурдарын батыһан, оҕолоргутун бу сайдыылаах үйэҕэ Арассыыйатааҕы таһымнаах тэрээһиннэргэ кытыннаран иһэргитигэр ыҥырабыт.
Елена ПОТОЦКАЯ, «Саха сирэ», edersaas.ru
Хаартыска: Александр Чириков дьиэтээҕи архыыбыттан