Дьааҥы улууһун олохтоохторугар көмө төлөбүрдэр бэриллэн эрэллэр

Бөлөххө киир:

Дьааҥы улууһугар күүстээх ардах содулун туоратыы, дьоҥҥо куттал суоһаабатын хааччыйыы, социальнай инфраструктураны чөлүгэр түһэрии боппуруостарын суһал мунньахха дьүүллэстилэр.

edersaas.ru

Cуһал мунньаҕы Баатаҕай бөһүөлэгэр РФ бырабыыталыстыбатын бэрэссэдээтэлин солбуйааччы -– Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев ыытта. Суһал иһитиннэриилэри Саха сирин Ил Дархана Айсен Николаев оҥордо.
«Биһиги бүгүн уу ылбыт сирдэрин, учаастактарын үөһээттэн көрдүбүт. Уу содулуттан эмсэҕэлээбит нэһилиэнньэни кытары көрсөн кэпсэттибит. Бүгүҥҥү мунньах чэрчитинэн содуллары туоратарга туох дьаһаллар ылыллалларын, үп-харчы төһө тиийэрин, нэһилиэнньэҕэ көмө хайдах оҥоһулларын истиэхпин баҕарабын. Уу аа-дьуо түһэр. Дьон урукку олохторугар төннөллөрүгэр, бэйэлэрин хаһаайыстыбаларын сөргүтэллэригэр тугу оҥоруохха наадатын бииргэ көрүөхпүтүн наада», -– диэн Юрий Трутнев мунньаҕы арыйда.
Өрөспүүбүлүкэ Ил Дархана Айсен Николаев хоромньуну сыаналыыр хамыыһыйа нэһилиэнньэлээх пууннарга үлэтин туһунан иһитиннэрдэ.
Алта бөһүөлэккэ хоромньуну ааҕыы үлэтэ түмүктэннэ, хаалбыт нэһилиэнньэлээх пууннарга эмиэ итинник үлэ ыытыллыаҕа. Кыра дохуоттаах дьоҥҥо төлөбүр оҥоһуллуута саҕаланна. Арассыыйа Үлэҕэ уонна социальнай сайдыыга министиэристибэтэ хайыы үйэ 1 мөлүйүөн 800 тыһ солк. уонунан дьиэ кэргэҥҥэ ыытта. Ону таһынан нэһилиэнньэ бары араҥатыгар материальнай көмөнү оҥорууну түргэтэтэргэ быһаарыы ылыллыаҕа.
Олорор дьиэлэри чөлүгэр түһэрэр, тырааныспар инфраструктуратын эбийиэктэрин саҥардар үлэлэр саҕаланнылар.  Бастатан туран, болҕомто бөһүөлэк иһинээҕи суоллар, хочуолунайдар туруктарыгар, сылааһы биэрэр трассалары, социальнай эбийиэктэри бэлэмнээһиҥҥэ ууруллуоҕа. Дьааҥы ууга барбыт бөһүөлэктэригэр сылааһы эрдэ биэрии былааннанар. Ууга барбыт сирдэртэн олохтоохтору, бастатан туран, оҕолору, көһөрбүттэрэ. Ол курдук, 300-чэ оҕону Дьокуускай куорат оҕону чэбдигирдэр лааҕырдарыгар  аҕалбыттара.
СӨ Ил Дарханын ыйааҕынан, Дьааҥы уонна Кэбээйи улуустарын сиригэр-уотугар ыксаллаах балаһыанньа эрэсиимэ киллэриллибитэ. Хас биирдии нэһилиэнньэлээх пууҥҥа олорор дьиэлэри куурдарга уонна олбуордары ыраастыырга үлэ ыытыллар.
Саха сирин Быыһыыр сулууспатын уонна Арассыыйа ЫБММ-тин быыһааччылара нэһилиэнньэҕэ аадырыстаммыт көмөнү оҥороллор. Эрэгийиэн салайааччыта Дьааҥыны халаан уутуттан көмүскүүр  инженернэй тутууну ыытыы  боппуруоһун көтөхтө. Наадалаах докумуоннар 2021 сыл атырдьах ыйыгар Арассыыйа ууга ресурстарын федеральнай агентствотыгар ыытыллыбыттара да, сайаапка күн бүгүҥҥэ диэри көрүүгэ, үөрэтиигэ сытар. Юрий Трутнев үөскээбит балаһыанньаттан тахсыы боппуруостарын бүгүн Саха сиригэр баһаар уонна халаан балаһыанньатын мунньаҕар көрүллүөҕүн туһунан эппитэ. Мунньах эппиэтинэстээх федеральнай министиэристибэлэр уонна биэдэмистибэлэр салайааччылара кыттыылаах ыытыллыаҕа.

Надежда ЕГОРОВА, «Саха сирэ», edersaas.ru (СӨ Ил Дарханын пресс-сулууспатын матырыйаалларыттан бэлэмнэннэ)

+1
0
+1
0
+1
0
+1
0
+1
0
+1
0
+1
0