Бу күннэргэ «Мин — инженербин» Уһук Илиҥҥи таһымнаах куонкурус- кэмпириэнсийэ куйаар ситиминэн ыытылынна.
edersaas.ru
Кэмпириэнсийэ оскуола оҕолоругар ыыппыт күөн-күрэһин туһунан Дьааҥы улууһун Баатаҕайыттан үөрэх методиһа Ульяна Шишигина кэпсиир:
— СӨ Инженердэр үрдүкү сэбиэттэрин салайааччыта Андрей Матвеев 9 улуустан 34 эдэр чинчийээччи Хатастан, Дьокуускайтан кыттыыны ылбытын иһитиннэрдэ. Суолталаах куонкуруска бэрди бэрт баһыйан, Дьааҥы улууһун Табалаах орто оскуолатын үөрэнээччитэ Данил Эверстов кыайыылааҕынан бэлиэтэннэ. Кыайыылаах оҕо кытай тыраахтарын оттооһуҥҥа уларытан оҥорбут буолан, болҕомтону тарта. Данил тыраахтара номнуо быйыл сайын үлэ бэрэбиэркэтин ааспыт. Ол курдук, саҥардыллыбыт, тупсарыллан оҥоһуллубут тыраахтарынан отчуттар 460 центнер оту сомсон ыллылар. Тэҥнээтэххэ, былырыын сайын 280 центнер от оттоммут.
Эдэр чинчийээччи Данил Эверстовка ылсар дьыалатыгар ситиһиилэри баҕарабыт!
Елена ПОТОЦКАЯ, «Саха сирэ» хаһыат, edersaas.ru