Дьааҥы сэлиэнньэлэриттэн оҕолору уонна кырдьаҕастары көһөртөөтүлэр

Ардах халааныттан эмсэҕэлээбит Дьааҥы оройуонун сэлиэнньэлэриттэн оҕолору көһөртүүллэр.

От ыйын 12 күнүгэр Баатаҕайга халаантан эмсэҕэлээбит нэһилиэнньэлээх пууннартан «Полярная авиалиния» уонна РФ ЫБММ «Ми-8» салгын аалларынан оҕолору уонна кырдьаҕастары көһөртөөтүлэр. Бу туһунан Саха сиринээҕи быыһыыр сулууспаттан иһитиннэрэллэр.

«Полярные авиалинии» Ан-26 салгын аалынан Баатаҕайтан Дьокуускайга оҕо лааҕырдарыгар сырытыннарарга 34 оҕону улахан дьон арыаллаах  аҕалбыттар.

СӨ Нэһилиэнньэ олоҕун-дьаһаҕын хааччыйыыга судаарыстыбаннай кэмитиэт бэрэссэдээтэлин э.т. Иннокентий Андросов салалтатынан, Дьааҥы оройуонун сиригэр-уотугар биэдэмистибэлэр икки ардыларынааҕы суһал бөлөх үлэтэ салҕанар. Олохтоох нэһилиэнньэҕэ СӨ Быыһыыр сулууспатын уонна РФ ЫБММ Саха сиринээҕи салаатын үлэһиттэрэ олохтоох нэһилиэнньэҕэ бары көмөнү оҥороллор.

Күн-дьыл туругар бэлиэтэммитинэн, чугастааҕы күннэргэ Дулҕалаах, Сартаҥ уонна Адыаччы өрүстэргэ уу таһыма үрдүк.