СӨ Быыһыыр сулууспата иһитиннэрбитинэн, Дьааҥы өрүскэ улахан массыына муус анныгар барбытыгар ууга былдьаммыт киһини водолазтар бөлөхтөрө көрдөөн, бэҕэһээ, олунньу 19 күнүгэр, 16:30 ч. булбуттар. Санатар буоллахха, олунньу 16 күнүгэр Быыһыыр сулууспаҕа Дьааҥы улууһун Оһохтоох сэлиэнньэтиттэн 10 км сиргэ Дьааҥы өрүскэ таас тиэнилээх «МАЗ» массыына муус анныгар барбытын туһунан суһал иһитиннэрии киирбитэ. Суоппар этэҥҥэ тыынын мананан быыһаммыт уонна Оһохтооххо тиийбит. Доруобуйатын туруга этэҥҥэ.
1983 с. төрүөх бииргэ айаннаан иһиспит киһитэ, хомойуох иһин, быыһамматах. Билиҥҥи туругунан, Дьааҥы өрүскэ тустаах учаастакка 30 туоннаҕа диэри ыйааһыннаах тимир көлөлөр туорууллара көҥүллэнэр. Билигин онно силиэстийэлиир уорган уонна ГИМС исписэлиистэрэ үлэлииллэр. Тимир көлө тиэммит таас чоҕун ыйааһына 20-чэ туонна эбит. Онон массыына ыйааһынын кытары барыта 50-тан тахса туонна буолан тахсар.