Тоһуттар тымныылаах ыраах Дьааҥы улууһугар ыҥырыаны иитиигэ холоммут хоһуун санаалаах дьоннор бааллар.
Барылас олохтооҕо Игнатий Слепцов ааспыт өттүгэр оскуолаҕа учууталлаабыта, дириэктэринэн үлэлээбитэ. Киин улуустарга эдэр дьон мүөттээх ыҥырыаны иитэллэрин туһунан истэн бэркэ сэргээбитэ. Итиэннэ бу сонун салааҕа ылсарга сананан, ыҥырыаны көрөргө уопуттаах Евгений Поличкоҕа түөрт ый үөрэммитэ. Син кыайыыһыкпын дии санаан, түөрт ийэ ууһа ыҥырыаны аҕалан, ааспыт сайын үлэтин саҕалаабыта.
Хайа тэллэҕэр турар Барылас айылҕата сымнаһыар, сир аһынан уонна отунан-маһынан баай, саамай сүрүнэ мүөттүгэннээх кучу от дэлэйдик үүнэр буолан, ыҥырыаны иитэргэ табыгастаах буолан биэрбит. Онон, сайын устатыгар биир ыҥырыа ууһуттан отут киилэ мүөтү сүүрдүбүт.
Дойдутугар саҥа салааҕа олук уурбут Игнатий Васильевич мүөттээх ыҥырыаны иитээччилэр элбээн иһиэхтэрин баҕаран, сэминээр ыытта. Пасекатын көрдөрдө, мүөт киһи доруобуйатыгар туһатын кэпсээтэ, ыҥырыаны иитиигэ туох наадатын сиһилии быһаарда, саҥа дьыаланы саҕалыыр киһиэхэ эрэнэн, өйөөбүтүн иһин улууһун баһылыгар Гаврил Чириковка махтанарын биллэрдэ диэн уулус дьаһалатын пресс-киинэ иһитиннэрэр.
Раиса Сибирякова, «Саха сирэ» хаһыат, edersaas.ru