Дьааҥы улууһун Суордаах, Дулҕалаах уонна Токума сэлиэнньэлэрэ ууга бараннар, улуус мэдиссиинискэй тэрилтэлэрэ нэһилиэнньэҕэ көмөнү оҥорорго бэлэмнэр.
От ыйын 11 күнүнээҕи туругунан, Дьааҥы улууһун оройуоннааҕы киин балыыһатыгар 35 эбии куойканы бэлэмнээтилэр. Ол иһигэр Баатаҕай балыыһатыгар – 25, Дьааҥы куорат балыыһатыгар – 10 куойканы.
Балыыһалар эминэн толору хааччыллыылаахтар, 60 сууккаҕа тиийэр эмп саппааһа баар.
Атын сиргэ кыайан көспөт, доруобуйаларынан хааччахтаах дьон, оҕо күүтэр дьахталлар уонна биирдэригэр диэри саастаах оҕолор ахсааннара чопчуланар.
Суордаах, Дулҕалаах уонна Токума сэлиэнньэлэригэр быстах олорор пууннарга биирдии биэлсэр үлэлиир.
Маны таһынан СӨ Ил Дархана Айсен Николаев ууга барбыт нэһилиэнньэлэр оҕолорун сынньалаҥ лааҕырдарыгар олохтуурга сорудахтаата.
Дьокуускай куоракка «Бэс чагда» сынньалаҥ уонна чэбдигирдии киинигэр Суордаах сэлиэнньэтиттэн 27 оҕону аҕаллылар. Манна барыта Дьааҥы уонна Кэбээйи оҕолоругар 200 миэстэ бэлэмнэннэ.
Надежда ЕГОРОВА, «Саха сирэ», edersaas.ru