Дьааҥы фанаттара «Арсенал» уонна «ЦСКA» киирсиитин илэ харахтарынан көрдүлэр
Бу ый саҥатыгар Лондон футболун аатырбыт «Арсенал» хамаандата Арассыыйаҕа кэлэн күрэхтэһэрин истээт, Дьааҥыттан үс фанат ыччат Москваҕа баран кэллэ.
edersaas.ru
Бу туһунан Дьулус Капитонов кэпсээбитинэн, ыччаттарбыт бырайыастарынан туһанан, аан дойдуга аатырбыт футбол сүдү хамаандалара («ЦСКК» уонна «Арсенал») 30 тыһыынча киһи киирэн көрөр «ВЭП» стадионугар күрэхтэспиттэрин илэ көрөн астынан кэллилэр. Стадиоҥҥа хаһааҥҥытааҕар да элбэх – 29 тыһыынчаттан тахса фанат мустубут. «Арсенал» уонна «ЦСКА» футбол хамаандалара 2:2 тэҥнэһэн баран, «Арсенал» син биир кыаҕын көрдөрбүт.
«Матч ТВ» суруналыыстара биһиги ыччаттарбытыттан интервью ылалларыгар Саха сириттэн тиийэ кэлбиттэрин истэн сөхпүттэр. Онон, ыччаттарбыт футбол баарын тухары, омугуттан, олорор сириттэн тутулуга суох, утуйары да умнан туран, кытаанах хапсыһыылаах футболу көрүөн баҕалаахтар ханна баҕарар баалларын итэҕэттилэр.
Маннык үйэҕэ биирдэ буолан ааһар ыһыылаах-хаһыылаах күрэҕи илэ көрүү ботуччу сыаналааҕа биллэр. Ол курдук, инники соҕус олорон көрөргө биир миэстэтэ 3500 тыһыынча эбит. «Арсенал» хамандатыгар дойду араас муннуктарыттан сүрдээх элбэх фанаттар кэлбиттэр, Лондон бэйэтин хамаандатыгар 400-тэн тахса киһи тиийбит. Биһиги ыччаппыт: Баатаҕай дьаһалтатын олоххо-дьаһахха отделын кылаабынай исписэлииһэ Дьулус Капитонов, кини кэргэнэ Туяра Николаевна уонна оҕо туризмын уонна этнография мусуойун методиһа Николай Слепцов үс күҥҥэ Москуба куоракка Кириэмил аттыгар «Ситим» хостел-гостиницатыгар түспүттэр.
Аан дойду чемпионатын лигатын таһаарар түмүгүн истии хас биирдии ыалдьааччы-фанатка доҕордоһуу тулхадыйбат тыынын иҥэрэр. Арассыыйаҕа аан дойду чемпионата буолуохтааҕын долгуйа кэтэспит фанаттар аны кэлэр сайыны күүтэллэр.
Раиса ЧИРИКОВА, «Саха сирэ» хаһыат, edersaas.ru