Өрөспүүбүлүкэҕэ сомоҕолоһуу сылынан, «Дьааҥы эдэр чинчийээччилэрэ» диэн наука сайыҥҥы оскуолата үлэтин саҕалыа.
Дьааҥы оройуонун Боруулаах сэлиэнньэтигэр от ыйын 15 күнүттэн билиини-көрүүнү хаҥатар сыаллаах-соруктаах итинник ааттаах сайыҥҥы лааҕыр үлэтэ саҕаланыа. Лааҕырга научнай-чинчийэр үлэҕэ оҕолору кытары үлэлээн ситиһиилэммит М.К.Аммосов аатынан ХИФУ эдэр учуонайдара, «Инникигэ хардыы» НПК уонна да атын кэмпириэнсийэлэр эспиэрдэрэ лиэксийэлэри ааҕыахтара. Бу лааҕырга Дьааҥы оройуонун оҕолоро дьарыктаныахтара.
Ураты форматтаах оскуоланы СӨ наукаларын аччыгый академията, М.Аммосов аатынан ХИФУ, Дьааҥы улууһун үөрэххэ управлениета, Боруулаах орто оскуолата, Дьокуускайга дьааҥылар научнай-үөрэтэр холбоһуктара тэрийдилэр. Манна оҕолор билиилэрин-көрүүлэрин дириҥэтэргэ, айар, толкуйдуур дьоҕурдарын сайыннарарга, сатабыллаах, чинчийиигэ, дириҥэтэн үөрэтиигэ дьулуурдаах, үлэлии үөрүйэхтээх буоларга үөрэтэргэ сыал-сорук туһаайыллар.
Үлэлэрин хайысхалара: тыыннаах айылҕа уонна тулалыыр эйгэ — Дьааҥы улууһугар тулалыыр эйгэ туругун уонна кыылын-сүөлүн, хамныыр харамайын арааһын чинчийии; филология-Дьааҥы сахаларын тылларын уратытын уонна диалектарын, глобализация усулуобуйатыгар тыл сайдыытын ситимин чинчийии; фольклор уонна культурология-Дьааҥы улууһун устуоруйатын, култууратын, глобализация кэмигэр уларыйыытын үөрэтии; быраап хайысхата-гражданскай быраабы уонна судаарыстыба төрүт быраабын дириҥэтэн үөрэтии.
Сайыҥҥы оскуолаҕа үөрэнэр оҕолор СНО-2019 хайысхатынан чинчийэргэ анаан эмпирическай матырыйааллары хомуйуохтара, ХАКАТОН уонна ФОРСАЙТ тэриллиэ. Нэһилиэнньэҕэ анаан эппиэтинэстээх төрөппүт буолууга кэпсэтии ыытыллыа, семинардар тэриллиэхтэрэ. Сайыҥҥы лааҕыр үлэтин түмүгүнэн научнай-практическай кэмпириэнсийэ ыытыллыа.
СӨ Ил Дарханын уонна Бырабыыталыстыбатын пресс-сулууспата.