Киһи иллэҥ кэмин туһалаахтык атаарыыта нэһилиэк олоҕун тупсарыыга эмиэ дьайыылаах.
edersaas.ru
Маннык санаанан Дьааҥы улууһун Эҥэ нэһилиэгин бэрэстэбиитэллээх уорганнарын дьокутааттара тэрилтэлэр салайааччыларын көҕүлээн, 5 хамаандаҕа хайдыһан, «Дартс», мээчиги үөһэ таба быраҕыы, миэстэттэн ыстаныы курдук спорт көрүҥнэригэр уонна волейболга спартакиада тэрийэн ыыттылар.
— Күрэхтэһии түмүгүнэн Эҥэ орто оскуолатын 1 №-дээх хамаандата бастаата, иккис миэстэҕэ —Сайдыы сүүмэрдэммит хамаандата, үһүскэ — олохтоох дьаһалта хамаандата таҕыстылар. Кыайыылаах хамаанда олохтоох дьокутааттар туруорбут көһө сылдьар кубоктарынан уонна мэтээллэринэн наҕараадаланнылар.
Бу спортивнай тэрээһини нэһилиэк олохтоохторун сомоҕолуурун, чөл олоххо тардыһыыны күүһүрдэрин быһыытынан, сыл аайы ыытыыһыбыт диэн санааҕа кэллибит.
Күрэхтэһиини тэрийсиигэ, ыытыыга сүүрбүт-көппүт дьоммутугар, тэрилтэ салайааччыларыгар дьокутааттар уонна олохтоох дьаһалта салалтатын аатыттан истиҥ махталбытын тиэрдэбит, — диэн «Эҥэ нэһилиэгэ» МТ баһылыга Виктор Бурцев санаатын тиэртэ. Нэһилиэк олоҕун тупсарыыга, кэскиллээх сайдыы түстэнэригэр, биллэн турар, духуобунас, эт-хаан өттүнэн чөл буолуу эмиэ оруоллаах буоллаҕа.
Ыраах Дьааҥыга олорор Эҥэ нэһилиэгин дьокутааттара бу өрүтү эмиэ учуоттаан, биир дойдулаахтарын иллэҥ кэмнэрин көхтөөхтүк атааралларыгар туһуламмыт дьону сомоҕолуур тэрээһиннэри толкуйдаан ыыталлара кэрэхсэбиллээх.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Виктор Бурцев түһэриитэ.