Бу күннэргэ Үтүө дьулуур сылынан сибээстээн, Дьааҥы оройуонунааҕы Дьахтар сэбиэтэ кырдьаҕас Верхоянскай куорат 380 сыллаах үбүлүөйүн көрсө ырааһырдыы субуотунньугу тэрийэн ыытта.
edersaas.ru
Тэрээһин улуустааҕы муниципалитет дьиэ кэргэн уонна ыччат бэлиитикэтин управлениетын кытта холбоһон ыытылынна.
— Массыынанан сылдьан субуотунньуктуур тэрээһиммитин «Үлэ айанын десана» диэн ааттаабыппыт. Дьокутааттар оройуоннааҕы сэбиэттэрин дьокутаат дьахталлара, Баатаҕайдааҕы «Надежда» уонна Остуолба нэһилиэгин дьахталларын сэбиэттэрэ, Верхоянскай к. дьаһалтата, психологическай киин, оройуоннааҕы «Автоледи» кулууп, лицей устудьуоннарын уонна преподавателлэрин, ыччат парламенын бэрэстэбиитэллэрэ кытыннылар. Остуолба нэһилиэгин дьахталлара Үтүө дьулуур сылын субуотунньугун кыттыылаахтарын алаадьылаах кымыһынан көрсөн, алгыс тылын бастыҥын эттилэр.
Бу сахалыы сиэри-туому толоруу мээнэҕэ буолбатах. Дьааҥы кырдьаҕас куоратыгар Верхоянскайга барар суолга дьон-сэргэ тохтоон ааһар «Шаман» диэн Ытык сир баар. Манна айанньыттар тохтоон, бэлэх биэрэн ааһаллар. Биллэн турар, бөх-сыыс мунньуллара ханна барыай? Ол сири баран иһэн ыраастаан ааһар уонна «Шамаҥҥа» мунньуллубут харчыны хомуйан, былырыын үлэҕэ киирбит Верхоянскай куорат Сибэтиэй Мотуруона Православнай Таҥаратын дьиэтигэр туттарар соруктаах буолан, сахалыы сиэри-туому толордубут. Аара баран иһэн, бөҕү-сыыһы ыраастаан, мунньуллубут харчыны хомуйан тиийдибит.
Верхоянскай куорат салалтата биһигини үөрэ-көтө көрүстэ. Чэйдээн баран, олохтоохтору кытта куорат биир киэн туттар Байҕал күөлүн таһын хомуйдубут.
Онтон Сибэтиэй Мотуруона Православнай Таҥара дьиэтигэр сылдьан, «Шаман» диэн Ытык сиртэн хомуйбут харчыбытын туттардыбыт.
2016 сыллаахха өрөспүүбүлүкэтээҕи Олоҥхо ыһыаҕа ыытыллыбыт «Хоптолоох» диэн Ытык кэрэ сиргэ тиийэн, Верхоянскай к. баһылыга Евгений Потаповка «Үбүлүөйдээх салама» эстафетатын туттардыбыт. Биһиги бэлэхпититтэн саҕалаан, кырдьаҕас куораппыт үбүлүөйдээх ыһыаҕар тэрилтэлэр түһүлгэни киэргэтиигэ араас саламалары оҥоруохтара, — диэн кэпсээтэ Дьааҥы оройуонунааҕы Дьахтар сэбиэтин салайааччыта, «Арассыыйа дьахталларын туһугар» норуот баартыйатын Дьааҥытааҕы салаатын салайааччыта Лариса Старостина.
Ити курдук, бары улуустарга дьахтар сэбиэтэ көҕүлүүр тэрээһиннэри тэрийэр. Онтон бу биир холобур — Дьааҥы улууһун дьахталларын «Үлэ айанын десана». Кинилэр Ытык сирдэргэ ыһылла сытар харчыны улуустардааҕы Таҥара дьиэлэригэр туттарыы саҥа ньыматын тобуллулар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Лариса Старостина түһэриитэ.
—