Курулас ардахтар кэннилэриттэн суукка устата хаххалааһын оҥоһуллубутун кэннэ, бэҕэһээ, от ыйын 11 күнүгэр күнүс 16 чаас кэнниттэн уу быһыты тоҕо көтөн, Бөтөҥкөс сэлиэнньэтэ олоччу кэриэтэ ууга барда.
Сэлиэнньэ Таала сиринэн улуус кииниттэн 5 км быһынна. Бөһүөлэк иһигэр бэйэ икки ардыгар сибээс мотуорунан эрэ баар. Социальнай эбийиэктэргэ, олорор дьиэлэргэ, хаһаайыстыбаннай тутууларга, тэпилииссэҕэ, оҕуруокка, тус баайга-дуолга, олбуорга улахан хоромньу таҕыста. Сэлиэнньэ дьаһалтата от ыйын 10 күнүгэр ыксаллаах быһыыны-майгыны биллэрэн, дьон дьиэтээҕи малын-салын быыһыырга, атын сиргэ көһөрөргө туруммута.
Уолуйуу суох, балаһыанньа хонтуруолланар диэн Дьааҥы улууһун дьаһалтатын пресс-сулууспата иһитиннэрэр.
Дьааҥы улууһугар быстах кэмҥэ дьону түһэрэр пууҥҥа 4,5 туонна малы тиэрдибиттэр. Бу сүрүннээн генератор, помпа, саппыкы, хомуллар орон уонна бастаан утаа ирдэниллэр табаар. Олору ардах уутуттан эмсэҕэлээбит нэһилиэктэринэн тарҕатыахтара.
Хаартыска: СИАтан.