Коронавирус дьаҥа тарҕамматын, эпидемиологическай балаһыанньа уустугурбатын туһугар, Дьокуускайга күүһүрдүллүбүт миэрэлэр ылыллаллар. Ол курдук, элбэх кыбартыыралаах дьиэлэргэ санитарнай ирэбиллэри толорон, сууйуу-сотуу үлэлэрэ салҕаналлар.
ТСЖ-лар уонна салайар компаниялар Роспортребнадзор сүбэтинэн, дьиэлэри дезинфекциялыыллар, сууйаллар-сотоллор. Бу туһунан Дьокуускай куорат дьаһалтатын пресс-сулууспата СИА иһитиннэрбит.
Ол курдук, салайар компаниялар тустаах дьиэ-уот олохтоохторо билэллэрин курдук, санитарнай ирдэбилинэн подъезд хаһан сууйулларын-сотулларын уонна дезинфекцияланарын туһунан кыраапыгы ыйыахтаахтар. Үлэ хайдах толоруллубутун туһунан күн ахсын куорат хаһаайыстыбатын үлэлэтэр сулууспаҕа отчуоттаныллар. Ону сэргэ, уокуруктар управалары эмиэ хонтуруоллууллар диэн СИА суруллар.
Дезинфекция былааннаммытынан 2424 эбийиэккэ ыытыллыахтаах. Итинтэн 1427 дьиэҕэ үлэ ыытыллыбыт. Ол эбэтэр, былаан 58,87% туолбут. Хлордаах сириэстибэнэн аан тутаахтара, домофон кунуопкалара, почта дьааһыктара уонна кирилиэс сыҥаһалара сотуллаллар. Роспотребнадзор дезинфекцияны күҥҥэ иккитэ ыытары ирдиир.
Санатан эттэххэ, Дьокуускай куорат дьаһалтата салайар компаниялар элбэх кыбартыыралаах дьиэлэргэ санитарнай ирдэбилинэн сууйууну-сотууну күүһүрдэллэригэр итиэннэ Роспотребнадзор сүбэлэрин кытаанахтык тутуһалларыгар дьаһайбыт. Профилактическай ирдэбиллэри тутуһуу хонтуруолланар.
Өскөтүн салайар компания эбэтэр ТСЖ элбэх киһи олорор дьиэтигэр дезинфекцияны оҥоро илик буоллаҕына, Дьокуускай куорат дьуһуурунай-диспетчерскэй сулууспатыгар (4112) 44-42-29, 44-42-51 уонна СӨ тутууну уонна дьиэни-уоту бэрэбиэркэлиир судаарыстыбаннай управлениетыгар (4112) 34-50-53, 34-26-44, эрийэн этэҕит, төл./факс (4112) 34-22-49, эбэтэр: ugszhn@sakha.gov.ru электроннай аадырыска суруйан биллэрэҕит. Киирбит сайаапкалар салайар компанияларга бэрэбиэркэҕэ ыытыллаллар. Бу туһунан СИА иһитиннэрэр.