Арассыыйа үрдүнэн алтынньы 30 күнүттэн сэтинньи 7 күнүгэр диэри өрөбүллэр биллэриллэн тураллар. Доруобуйа харыстабылын министиэристибэтэ уонна суһал ыстаап бу күннэргэ ханна да айаннаабакка дьиэҕитигэр олоруҥ диэн ыҥыраллар. Ону сэргэ быһыыны ыла илик дьоҥҥо туһаайан, бу күннэри туһанан быһыыны ылалларыгар этэллэр.
Доруобуйа харыстабылын миниистирин э.т. Лена Афанасьева суһал ыстаап мунньаҕар иһитиннэрбитинэн, билиҥҥи туругунан, өрөспүүбүлүкэҕэ кэлбит быһыы 76 % туһаныллыбыт. Коронавирус дьаҥыттан иккис быһыыларын 369,8 тыһыынча киһи ылбыт.
“Суһал ыстаап уонна Доруобуйа харыстабылын министиэристибэтэ коронавирус дьаҥын бохсууга бу күннэргэ ханна да айаннаабакка дьиэҕитигэр олоруҥ диэн ыҥырабыт. Дьаҥ-дьаһах тарҕаныытын бохсуу хас биирдиибититтэн тутулуктааҕын умнумаҥ”, – диэн иһитиннэрэр Лена Афанасьева.
Быһыыны биэрэр пууннар өрөбүлэ суох үлэлии тураллар. Манна коронавирус дьаҥын быһыытын таһынан, тумууну утары быһыыны эмиэ ылыахха сөп. Ааспыт сууккаҕа өрөспүүбүлүкэ үрдүнэн 287 киһи ыалдьыбыт. Итинтэн 142 киһи Дьокуускай куорат олохтооҕо. Улуустары ылан көрдөххө, билигин Алдаҥҥа, Мирнэйгэ, Эдьигээҥҥэ, Уус Алдаҥҥа, Хаҥаласка, Мэҥэ Хаҥаласка, Өймөкөөҥҥө, Өлөөҥҥө элбэх киһи ыалдьар.
Аграфена КУЗЬМИНА