СӨ Доруобуйа харыстабылын миниистирэ Елена Борисова өрөспүүбүлүкэҕэ коронавирустааччы ахсаана сыыйа аҕыйаан эрэрин, ол гынан баран, дьаҥ өссө да ааһа, хаптайа илигин бэлиэтиир.
Кини маҥнай утаа үксүн эдэр дьон дьаҥныыллара бэлиэтэммит буоллаҕына, кэлин саастаахтар ыалдьыылара элбээбитин эттэ диэн СӨ Ил Дархан уонна Бырабыыталыстыба пресс-сулууспата суруйар. Маныаха миниистир хааччахтанан олоруу эрэсиимэ сымнатыллыбытынан, дистанционнайтан көһөн үлэҕэ тахсыы дьаҥ ааһан-араҕан биэрбэтигэр төрүөт буолуон сөбүн бэлиэтээбит. Билиҥҥи туругунан 12 тыһыынчаттан тахса оҕо тыа сирдэригэр сынньана тиийбитин, ол гынан баран, оҕолортон дьаҥҥа сыстыы түбэлтэлэрэ баарын ыйбыт. Маны таһынан, айылҕаҕа элбэх буолан сынньана тахсыы эмиэ кутталлаах диэбит. Дьаҥҥа хаптарбыт биир киһини кытары 20-30 киһиэхэ тиийэ хантаактаһыахтарын сөбүн, бу дьон салгыы атыттары кытары хантаактаһалларын, онон дьаҥы тарҕатыы элбээн тахсарын эппит. Итинэн миниистир хас биирдии киһи бары ирдэбили билигин даҕаны кытаанахтык тутуһуохтааҕын, элбэх буолан мустуу тохтотуллуохтааҕын өссө төгүл өйдөппүт.
Миниистир Елена Борисова өрөспүүбүлүкэ бары олохтоохторун, ордук чуолаан, үлэни биэрээччилэр санитарнай ирдэбиллэри булгуччу тутуһалларыгар ыҥырбыт. «Ыалдьааччы ахсаана аҕыйаабытын да иһин, коронавирус дьаҥа өссө да ааһа илигин умнуо суохтаахпыт», — диэбит. Бу туһунан СӨ Ил Дархан уонна Бырабыыталыстыба пресс-сулууспата суруйар.