Ахсынньы 8 күнүгэр өрөспүүбүлүкэ үрдүнэн 198 киһи коронавируһунан ыалдьыбыта бигэргэннэ. Ол иһигэр Дьокуускайга 96 киһи ыарыйда. Өр кэмҥэ киин куоракка 100-тэн тахса киһи ыалдьар этэ, билигин намтаан эрэрэ көһүннэ. Бу туһунан өрөспүүбүлүкэтээҕи суһал ыстаап салайааччытын солбуйааччы Ольга Балабкина брифиҥҥэ иһитиннэрдэ.
Ордук элбэх киһи Өлүөхүмэ, Нерюнгри, Алдан оройуоннарыгар ыалдьыбыт. Өрөспүүбүлүкэҕэ ыалдьыбыт дьон уопсай ахсааныттан 60%-ра үтүөрбүт.
Суукка иһигэр 1278 ПЦР анаалыс оҥоһуллубут. Сорох улуустар ИХА, ИФА ньыматынан анаалыс оҥорорго быһаардылар, онон түмүгүн түргэнник таһаарар буолбуттар.
Бу нэдиэлэттэн култуура тэрилтэлэрэ үлэлэрин саҕалаатылар. Роспотребнадзор саайтыгар ханнык санитарнай ирдэбиллэри тутуһуохтаахтара суруллубут. Ол курдук, саалалар аҥаардара эрэ туолуохтаах, рециркулятор туруохтаах, көрөөччүлэртэн маасканы, бэрчээккини кэтэри ирдиэхтээхтэр.
Ил Дархан Айсен Николаев саҥа ыйааҕар уларытыылары киллэрэргэ бэлэмнэнэр. Онно атыы-эргиэн тэрилтэлэригэр сыһыаннаах саҥа миэрэлэр тустарынан буолуо диэн Ольга Балабкина иһитиннэрэр.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн