Ил Дархан Айсен Николаев өрөспүүбүлүкэҕэ коронавируһу утары үлэлиир штабы салайарын тэлбиисэринэн буолбут быһа биэриигэ иһитиннэрдэ.
Күн ахсын хаста да дьону-сэргэни улаханнык долгуппут коронавирус дьаҥын, ыарыыны тарҕаппат туһугар ыытыллар үлэҕэ-хамнаска сыһыаннаах боппуруоһунан мунньахтар ыытыллалларын, ол иһигэр телекоммуниаЦионнай үлэлэргэ, дьоҥҥо-сэргэҕэ араас өҥөнү оҥорууга эмиэ болҕомто уурулларын иһитиннэрдэ. Маныаха бу хайысханан дойдуга лиидэрдэр ахсааннарыгар киирэрбитин бэлиэтээтэ. Ол курдук өҥөнү оҥоруу араас хайысхата кэҥээбит. Эпидемия кэмигэр дьоҥҥо табыгастаах буоллун диэн итинник сервистэр өссө элбээбиттэрин, аһы-үөлү тиэрдэн биэрииттэн саҕалаан, ХИФУ онлайн куурустары ыытарын, сахалыы киинэлэр көрдөрүллэллэрин, о.д.а. баарын, ону дьон сэргээн туһанарын эттэ.
Маны барытын дьоҥҥо-сэргэҕэ өссө киэҥник биллэрэн, тиэрдэн иһэр наадатын ыйда. Онон барыы-кэлии аҕыйаан, аралдьыйар сирдэр үлэлэрэ тохтоон турар кэмигэр, маннык өҥөнөн туһаныыга кыһалҕа суох буолуоҕун эттэ.
Бу барыта дьон доруобуйатын харыстыыр туһугар оҥоһуллар.