Бүгүҥҥү туругунан хас киһи коронавирус дьаҥар хаптарбытый?
Бүгүн эмиэ халлаан тымныйда. Сорохтор Саха сирин тымныыта күүстээх, хаптатар ини диэн эрэнэллэр. Бүгүн дьаҥ тарҕаныытын туругун туһунан брифини коронавируһу бохсууга Саха сиригэр суһал ыстаап салайааччытын солбуйааччы Ольга Балабкина ыытта.
Бүгүҥҥү туругунан, өрөспүүбүлүкэ үрдүнэн сууккаҕа 193 киһи ыалдьыбыт. Ол иһигэр, Дьокуускайга – 88 киһи. Салайааччыны солбуйааччы этэринэн, бүгүҥҥү көрдөрүүнэн дьаҥҥа хаптарыы 200-кэ тиийбэтэҕин, онон бу ааспыт икки ый устатынааҕы көрдөрүүтээҕэр арыычча тупсуу баарын бэлиэтээтэ. Оттон атын улуустарга балаһыанньа хайдаҕый диир буоллахха, Мииринэй, Нерюнгри, Алдан оройуоннарыгар балаһыанньа уустук (15-13 киһи). Ону тэҥэ Мэҥэ Хаҥаласка, Ленскэйгэ туһааннааҕынан 8-7 киһи ыалдьыбыта биллибит. Өрөспүүбүлүкэ 20 оройуонугар бииртэн алтаҕа диэри киһи хаптарбыта этилиннэ.
РоспотребнадзорСӨ управлениетын уонна Доруобуйа харыстабылын лабораториялара ааспыт сууккаҕа 2599 лабораторнай чинчийиини ыыппыттар.
Ольга Валерьевна өрүү буоларын курдук, хамсык кэмигэр сэрэтэр үлэ күүһүрэрэ наадатын бэлиэтээтэ. Ол курдук, саргылаах Саҥа дьыл чугаһаабытынан сүрүн сыалынан-соругунан ыарыыга хаптарыыны, сыстыыны аччатыы буолар. Онуоха буолаары турар утренниктарга, бырааһынньыктарга оҕолор дьоҕус бөлөҕүнэн Саҥа дьыл бырааһынньыгын көрсөллөрө ирдэнэрин чопчулаата. “Дьоҕус бөлөҕүнэн көрсөн, Тымныы оҕонньортон бэлэхтэрин ылыахтаахтар”, — диэн өссө төгүл тоһоҕолоон бэлиэтээтэ кини.
Онон харыстаныҥ, мааската кэтиҥ, ыарыыга хаптарымаҥ!
Бэлэмнээтэ :Женни Стрюкова
Хаартыска: интэриниэттэн