«Дьаҥ хаптайара ирдэбили тутуһарбытыттан эмиэ тутулуктаах»

Бөлөххө киир:

Аан дойдуну аймаабыт коронавирус уодаһыннаах дьаҥа Саха сиригэр тиийэн кэлбитэ эрэ баар буолбута. Билигин бу дьаҥы бохсууга үлэлэр тиһиктээхтик салҕаналлар. 

Дьон-сэргэ туох санаалааҕый? Тулагы олохтооҕо, үлэ бэтэрээнэ Ксения Львовна Баишева:

Бу наһаа кутталлаах  дьаҥы аахайбат, улахаҥҥа уурбат буолуу, бобуу баарын үрдүнэн сыстыам, хаптарыам суоҕа диэн истибэт, ирдэбили тутуспат буолуу төрүт сыыһа. Туора дьону харыстыахха эмиэ наада.

Мин санаабар, коронавирустаабыттары сыыппаранан эрэ этэллэрин иһин, сорохтор кулгаахтарын таһынан аһараллар, итэҕэйбэттэр, үрдүнэн сыһыаннаһаллар. Арай, Мэҥэ Хаҥаластан биир киһи аатын-суолун аһаҕастык этэн туран, бу чахчы олус кутталлаах, уодаһыннаах дьаҥҥа хаптарбытын хайдах баарынан суруйбутун киһи улаханнык долгуйан ааҕар, итэҕэйэр, ылынар. Киниэхэ махтаныах тустаахпыт, аһаҕастык кэпсээн дьону сэрэппитигэр. Маннык иһитиннэриитэ, туһугар, хорсун хардыы. Мин санаабар, маннык аһаҕас иһитиннэриилэр, арыт, дьоҥҥо быдан тиийимтиэлэр, дьайымтыалаахтар даҕаны.

Коронавирус дьаҥа саҥа турарын саҕана, Кытай бырааһа сэрэтэрин, өйдөтөрүн  истибитим. Онно адьас кутталлаах күннэр-дьыллар бүрүүкээбиттэрин бэлиэтээбитэ. Итиэннэ туох түбэспити уулуссаҕа ылан аһаамаҥ диэн сэрэппитэ.  Аһы-үөлү хайаан да үчүгэйдик буһаран эрэ баран аһыырга,  оҕуруот аһын, фруктаны  кичэллээхтик сууйан эрэ баран сииргэ сүбэлээбитэ. Билигин, уулуссаҕа сылдьан, оҕолорго мороженайы да ылан биэримиэххэ наада.   

Дьаҥ туруоҕуттан, мин дьиэҕэ хааччахтанан олорууну кытаанахтык тутуһабын.  Чугастааҕы маҕаһыыҥҥа да барбаппын, күрүөм-хаһаам иһиттэн быкпаппын. Ол оннугар, тиэргэммэр дьарыгым элбэх. Оҕуруоппар үлэлиибин,  ааҕабын, сонуннары көтүппэккэ көрөбүн. 

Итиэннэ дьиэҕэ хааччахтанан олоруу эрэсиимин киллэрбиттэрэ саамай сөптөөх диэн этэбин. СӨ Бырабыыталыстыбата, быраастарбыт, Роспотребнадзор олус элбэх уонна улахан эппиэтинэстээх түбүгү көрүстүлэр. Дьон-сэргэ итэҕэйиэн, өйдүөн, ылыныан, ирдэбиллэри тутуһуон наада. Биһиги коронавирус ааһарын туһугар, ирдэбиллэри тутуһан, кинилэргэ өйөбүл буолуохтаахпыт. Билбэппит эбээт, бу ыарыы кэлин туох содуллаах буолуоҕун. Онон, доҕоттор, бары биир өйүнэн-санаанан салайтаран, бу уодаһыннаах дьаҥ хаптайарыгар төһүү, тирэх буолуоҕуҥ, — диэн эттэ.

edersaas.ru

+1
0
+1
0
+1
0
+1
0
+1
0
+1
0
+1
0