Дьаҥ хаптайан эрэр, ол эрээри маасканы уһуларга эрдэ. Манна ааҕыҥ.
Бүгүн өрөспүүбүлүкэҕэ коронавируһу бохсууга суһал ыстаап салайааччытын солбуйааччы Ольга Балабкина уочараттаах брифинин ыытта. Ольга Валерьевна кэпсээбитигэр олоҕурдахха, дьаҥ балачча хаптайбыт. Ол курдук, бүгүҥҥү туругунан, 71 киһи ыалдьыбыта биллибит. Итинтэн Дьокуускайга – 29 киһи. Мииринэй уонна Өймөкөөн оройуоннара ыстаап салайааччытын солбуйааччыны долгуталлар. Манна ыарыыга сутуллуу улахан соҕус. Ону тэҥэ Томпо оройуона. Томпоҕо уонна Өймөкөөҥҥө дьаҥ кытыы нэһилиэктэргэ тиийбитэ бэлиэтэнэр. Онон О.Балабкина улуустардааҕы ыстааптар ыарыы кытыы нэһилиэктэргэ тиийбэтин туһугар үлэни тэрийиэхтээхтэрин санатта.
Өрөспүүбүлүкэ үрдүнэн 15 лаборатория үлэлии турар эбит. Ааспыт сууккаҕа кинилэр 2088 чинчийиини ыыппыттар.
26504 киһи бастакы быһыыларын ылбыттар. Билигин өрөспүүбүлүкэҕэ вакцина кэлэрин кэтэһэллэр. Ол кэллэҕинэ быһыыны биэрии салҕаныаҕа.
“Төһө да быһыы-майгы туруктаах буолан эрэрин үрдүнэн, булгуччу маасканы кэтиини, тэйиччи туттан сылдьыыны тутуһуохтаахпыт”, — диэн түмүктээтэ брифинин Ольга Валерьевна.
Бэлэмнээтэ Женни Стрюкова
Хаартыска: тустаах саайтан