Култуура

«Дьүрүскэн оһуор» ыһыах түһүлгэтигэр

Быйылгы Үрүҥ Тунах Ыһыах пандемиянан сибээстээн өрөспүүбүлүкэбит баһылыгын ыйааҕынан онлайн  ыытыллар буолбутун бары истэн-билэн олоробут. Саха дьоно барахсаттар уһун кыһын кэнниттэн күөххэ көччүйэр,сылы туораабыт үөрүүтүн былыр былыргыттан үгэс быһыытынан самаан сайынын чорооннорго кутуллубут кыынньар кымыһынан, арыылаах алаадьынан, сыалаах сылгы этинэн ыһыах ыһан, күүстээхтэр күөн көрсүһэн, оһуохайдаан, ыллаан-туойан, ат сүүрдэн, сахалыы таҥас арааһын кэтэн киэргэнэн-симэнэн, тэринэн аҕай көрсөр үгэһинэн, төһө да ыарыы хаайдар, дьон-сэргэ син биир, ээр-сэмээр кэтэһэр. Ол иһин үгэһи кэһимээри, туох баар ыытыллыахтаах тэрээһиннэр: ыһыах арыллыытыттан, алгыһыттан саҕалаан «Дыгын оонньууларыгар», араас иискэ-ууска, ырыаҕа-тойукка тиийэ барыта көрдөрүллэрэ былааннанан бу күннэргэ «Саха» НКИХ  көрдөрөр-иһитиннэрэр  хамаандата сарсыардаттан киэһээҥҥэ диэри ыһыах ыытыллар миэстэтигэр үлэлээтэ.

Ол иһигэр «Сахалыы таҥас» общественнай тэрилтэ иһинэн «Сылааһынан угуттуур олбох» диэн иистэнньэҥнэр күрэстэрэ алтыс сылын ыытыллар түһүлгэтин ырыанан киэргэтэр сыалтан ырыа куттаах «Дьүрүскэн оһуор» ансаамбыл кыттар чиэскэ тиксэн бэс ыйын 14 күнүгэр Үс Хатыҥҥа ыһыах программатын чэрчитинэн видеоклипкэ уһулунна. Бу ансаамбыл 2015 сыллаахха олунньуга, этиллибитин курдук, «Сахалыы таҥас» (салайааччы Светлана Борисовна Максимова) иһинэн саха таҥаһын баай историятын, культуратын ырыанан көрдөрөр, дьон-сэргэ сэҥээриитин тардар, көҕүлүүр сыаллаах-соруктаах тэриллибитэ,

Музыкальнай салайааччынан оччолорго биллиилээх мелодист А.К.Калининскай-Лунха Өлөксөй анаммыта, саҕалаабыта. Ансаамбыл бастакы аата «Көмүс сүүтүк»диэн этэ. Кэлин уопсай сүбэнэн үлэ ис хоһоонун ордук арыйар, тириэрдэр диэн «Дьүрүскэн Оһуор»дэммитэ, ити сыл күһүнүгэр 40-чаҕа тиийэр киһи, талааннаах музыкант, ырыаһыт, баянист Алексей Потапов салайыытынан дьарыктаммыта.

2016 сылтан ансамбль салайааччытынан СӨ үтүөлээх учуутала, Россия үөрэҕириитин туйгуна, педагогическай колледж музыкаҕа салаатын преподавателэ, опыттаах хормейстер Альбина Афанасьевна Пилецкая ананан ырыаны толоруу, истии, музыка алыбын кистэлэҥнэрин арыйыы хайысханан ситиһиилээхтик күн бүгүҥҥэ диэри салайа, үлэлии сылдьар. Ансаамбыл куоракка биир биллэр коллективка тиийэ үүнэн, билигин сыл аайы ыытыллар куорат, республика араас көрүҥнээх тэрээһиннэригэр көхтөөхтүк кыттарын таһынан, тас дойдуларынан, куораттарынан гастроллаан,саха ырыатын-тойугун, оһуордаах-мандардаах таҥаһын-сабын, үҥкүүтүн, культуратын тарҕата, киэҥ эйгэҕэ таһаара сылдьар коллективынан биллэр буолла.Ону элбэх ахсааннаах грамоталара,дипломнара туоһулууллар. «Дьүрүскэн оһуорга»кэрэҕэ, үтүөҕэ тардыһар араас идэлээх, араас саастаах кэрэ далбардар түмсэн ырыа алыптаах ыллыгынан үүнэллэр, сайдаллар. Ити курдук, бэс ыйын 14 күнүгэр Үрүҥ Тунах ыһыах туонатыгар Үс Хатыҥҥа эрдэттэн бэлэмнэнэн, таҥас-сап тиктэн, бэлэмнэнэн «Олонхолоох Сахам сирэ» диэн Николай Чуор тылыгар, Владимир Индигирискэй музыкатыгар суруллубут ырыабытынан видеоклипкэ уһуллаары муһуннубут. Бары ирдэбиллэри тутуһан, 14.00 чааска ыҥырыылаах сирбитигэр баар буоллубут. Биһигини»Сахалыы таҥас» салайааччыта Светлана Борисовна Максимова бэйэтинэн үөрэ-көтө көрүстэ.

Таҥнан-симэнэн кыратык өссө бэлэмнэнэн, күөх хонуу устун сибиэһэй салгыҥҥа кэтэһэ таарыйа хаартыскаҕа түстүбүт. Ансамбль састааба кыралаан уларыйа турар буолан бэйэ-бэйэбитин даҕаны, саҥа дьону да кытта билсистибит. Хоһоон-ырыа суруйар айар куттаах саҥа кыргыттар хоһооннорун күөх өндөл халлааны оһуордаах олбоххо сытан иһиттибит, ырыаларбытын ыллаатыбыт, кэтэһэр кэммитин билбэккэ хааллыбыт. Олег Колесов-Талбан салалтатынан уһуллуубут өр буолбата — биир түһэриинэн бүттүбүт. Түмүкпүтүгэр,  ыһыах түһүлгэтигэр кэлбит дьон сиэринэн төбүрүөннүү төгүрүччү олорон, сирбитин аһатан, кыратык олоро түһэн, быыппахпытын истибит, аспытын-үөлбүтүн тартыбыт. Итинник туһугар биир сэргэх,өйгө-санааҕа хаалар үтүө күн «Дьүрүскэн оһуорга»  буолан ааста.  Түмүкпэр «Сахалыы таҥас» общественнай тэрилтэ салайааччытыгар Светлана Борисовнаҕа маннык улахан тэрээһиннэргэ биһиги ансаамбылбытын ыҥыран, ыһыах ыытар тэрээһинигэр кытыннарбытыгар коллектив аатыттан барҕа махталбытын тиэрдэбит.

«Дьүрүскэн оһуор» ансамбль аатыттан суруйда Татьяна Потапова-Татыйык    Мыла,   

Дьокуускай

0
0