Дүпсүннэр иһэр уулара — сир анныттан

Ааптар: 
Бөлөххө киир:

Уус Алдан улууһун Дүпсүн нэһилиэгэр тыа хаһаайыстыбатын салаатыттан саҕалаан, үөрэх, тутуу, ОДьКХ салааларыгар сонун сүүрээн олоххо киирэ турара харахха быраҕыллар.

Улууска командировкаҕа сылдьан массыынанан ааһан иһэн,  саҥа тутуулартан дьоҕус дьиэни бэлиэтии көрдүм. Баһылыгы солбуйааччы Иван Федоровтан ыйыппыппар, бу кыракый тэрилтэ “буорахтаах” буолан биэрдэ — олус суолталаах саҥа тутуу эбит. Иван Иванович бэлиэтииринэн, олохтоохтор өр сылларга иһэр уулара чугаһынан суох буолан, уустуктары көрсөллөр эбит. Сыл аайы араас таһымнаах салалтаҕа туруорсан, 2020 сыллаахха сир анныттан ыраас ууну хачайдыыр анал тэриллээх ыстаансыйаны тутуу саҕаламмыт.

“Якутгеология” тэрилтэ 500 м сири  дьөлө хаһан, 2021 сыллаахха сир анныттан ыраас иһэр ууну хачайдаан туһанар ыстаансыйаны кылгас кэм иһигэр тутан үлэҕэ киллэрбиттэр.

— Быйыл бэркэ кыстаатыбыт. Улуус баһылыга Алексей Федотов, нэһилиэк баһылыга Николай Сивцев ыллыктаах туруорсууларын СӨ Бырабыыталыстыбата быһаччы өйөөн, ыстаансыйабыт биир сыл иһигэр тутуллан, үлэҕэ киирдэ. Онон сүүрбүт-көппүт дьоммутугар олохтоохтор махталбыт муҥура суох. Улуустааҕы ОДьКХ бэйэтин балансатыгар ылбыта – манна үс оператор быысаһа сылдьан үлэлиир, — диэн баһылыгы солбуйааччы Иван Федоров ыстаансыйаны көрдөрө сылдьан кэпсээтэ. Онон олохтоохтор, кырдьык, олус абыраммыттар.

Елена ПОТОЦКАЯ, «Саха сирэ» хаһыат.

Ааптар хаартыскаҕа уонна видеоҕа түһэриитэ.

+1
0
+1
0
+1
0
+1
0
+1
0
+1
0
+1
0