Дүпсүннээҕи Космонавтика мусуойугар учуутал Иван Жирков аатын иҥэрдилэр

Бу күннэргэ Саха сиригэр Арассыыйа Дьоруойа, Госдума дьокутаата, космонавт Роман Романенко ыалдьыттыы кэлэ сылдьар.

edersaas.ru

Кини Саха сиригэр кэллэр эрэ, Уус Алдан улууһун Дүпсүн нэһилиэгэр баар Космонавтика мусуойугар хайаан да сылдьан ааһар. Ол үгэһин космонавт бу да сырыыга тутуста.

Күндү ыалдьыттарын дүпсүннэр хайдах көрсүбүттэрин туһунан бибилэтиэкэр Евдокия Атласова бу курдук кэпсиир:

— Космонавт Роман Романенко Дүпсүҥҥэ 2011 сыллаахха  кэлэ сылдьыбыта. Онон иккиһин  ыалдьыттыыр буолан, кинини биһиги дойдутугар кэлэр курдук көрүстүбүт.

Быйыл Дүпсүннээҕи Космонавтика мусуойа төрүттэммитэ 45  сылын туолла.  Бу үөрүүлээх бэлиэ түгэнинэн сибээстээн, үөрүүлээх быһыыга-майгыга Дүпсүннээҕи Космонавтика уонна Саха сирин авиациятын мусуойугар бу түмэли төрүттээбит, РСФСР үөрэҕириитин туйгуна, САССР оскуолаларын үтүөлээх учуутала В.И. Кузьмин аатынан бириэмийэ лауреата, ытыктабыллаах учууталбыт Иван Данилович Жирков аата иҥэрилиннэ.

Дьоһун киһи аата үйэтитиллиитин биһиги, дүпсүннэр, олус киэн тутта уонна долгуйа иһиттибит.

Киэҥ куйаарга тахса сылдьыбыт космонавт Роман Романенко үтүө алгыс   тылыттан санаабыт көтөҕүлүннэ, ыалдьыппытын саха норуотун абыычайынан сиэрбитин -туоммутун тутуһан арчылаатыбыт. В.В. Никифоров аатынан технопарк эбии үөрэхтээһин киинин иннигэр нэһилиэнньэни кытта үөрүүлээх көрсүһүү кэнниттэн мусуойга экскурсия буолла. Ыалдьыттарбыт бэйэлэрин тустарынан олохтоохтор  саныы-өйдүү сылдьалларыгар анаан өйдөбүнньүк маһы олортулар.

Москваттан космонавт Роман Романенконы арыаллыы сылдьар эппиэттээх үлэһиттэр РФ Космонавтикаҕа академиятын Илин-Сибиирдээҕи салаатын көһө сылдьар мунньаҕар өрөспүүбүлүкэттэн, улуустан кэлбит салайааччылары кытта көһө сылдьар мунньаҕы тэрийдилэр.

Космонавт Роман Романенко  Туймаада Ыһыаҕар кыттыыны ылла.

Елена ПОТОЦКАЯ, «Саха сирэ» хаһыат, edersaas.ru