Сыстыганнаах дьаҥ кэмигэр үгүс тэрилтэлэр куйаар ситиминэн үлэҕэ көһөн, дьон хаһааҥҥытааҕар да араас сонуну, ыытыллар тэрээһини көрөр-истэр, билэр буолла.
edersaas.ru
Кэрэхсэбиллээҕэ баар, ордук нэһилиэктэр олохтоох дьаһалталара социальнай ситимнэринэн — инстаграмынан, батсаабынан күннээҕи олоҕу-дьаһаҕы хаартыскаҕа түһэрэн, видеоҕа устан кэпсииллэрэ, олохтоохтору эрэ буолбакка, интэриэһиргиир дьон барыта киирэн ааҕар.
Биһиги, суруналыыстар, киһи болҕомтотун тардар сонуннары «Эдэр саас» саайтка уонна «Саха сирэ» хаһыакка сырдатан, биир нэһилиэк сэргэх сонуна өрөспүүбүлүкэҕэ барытын билиитигэр-көрүүтүгэр тахсар.
Мин өрөбүл күн улуустар уонна нэһилиэктэр инстаграмнарын ырытан көрдүм. Хомойуох иһин, сорохтор наар хартыынанан, айылҕаны түһэриинэн муҥурданаллар эбит. Бүлүү улууһун Тылгыны уонна Чочу, Ньурба улууһун Үөдэй нэһилиэктэрин, Амма уонна Үөһээ Бүлүү улуустарын дьаһалталарын инстаграмнарыттан киһи бу нэһилиэктэр уонна улуустар олохторун-дьаһахтарын, күннээҕи түбүктэрин билэ олорор. Бу ааттааммыттар инстаграмнарын сирэйин күн аайы кэриэтэ толоро олороллор. Оттон үтүмэн элбэх улуус уонна нэһилиэк арыммыт инстаграм-сирэйдэрэ ыам ыйынан уонна бэс ыйынан бүтэн, туолбатахтара ырааппыт. Дьиҥэр, олохтоохтор күүтэн эрэр буолуохтаахтар. Онон бу матырыйаалы ааҕан баран, үгүстэр көннөрүнүөхтэрэ диэн эрэнэбит. Мин биир бастыҥынан Үөһээ Бүлүү улууһун Дүллүкү нэһилиэгин инстаграмын сирэйин ааттыахпын баҕарабын.
Киһи аҥардас инстаграм киирии сирэйиттэн холобур ылыах курдук. Дүллүкү хас сыллаахха төрүттэммитэ (сорох нэһилиэк олохтоохторо нэһилиэктэрэ төрүттэммит сылын да билэллэрэ саарбах), иэнэ, нэһилиэнньэтин ахсаана барыта суруллубут. Бу, биллэн турар, аҕыйах тыл эрээри, иитэр-үөрэтэр суолтата сүҥкэн. Киһи күн аайы көрөн, нойосуус да билэрэ чахчы.
Аны ис хоһооно барыта —күннээҕи үлэ-хамнас, олохтоохтор түбүктэрэ, биллэриилэр. Быһата, олохтоох дьаһалта инстаграмын сирэйин олохтоохторун кытта сибээһигэр хото туһанара харахха быраҕыллар. Ыраата барбакка, биир сонуну билиһиннэриим:
«Бу күннэргэ Дүллүкүттэн Бүтэйдээххэ барар аартык икки үрэҕэр икки турба угуллан, суол биллэ тубуста.
Үрэн диэки барар отчуттар, Кырыкый нэһилиэгин айанньыттара абыраннылар. Дэриэбинэ иһигэр арҕаа Добдур уулуссаҕа саас, күһүн уу баһар массыына киирбэккэ элбэх ыал эрэйдэнэр этэ.
Манна 600 м уһуннаах гравий бүрүөһүннээх суол оҥоһуллан, түөлбэ олохтоохторун үөрүүлэрэ үксээтэ.
Дэриэбинэ ортотунан түөрт үрэх киирэн ааһар. Үөс өттүнэн үчүгэй суола суох олорбуппут. Билигин түөрт турба угуллан, тилэри суол баар буолла. Суол оҥорор Үөһээ Бүлүүтээҕи «ИНБЛАВЕР» тэрилтэ үлэһит уолаттарыгар махтанабыт!».
Дүллүкүлэр инстаграмнарын сирэйэ бу курдук нэһилиэктэрин олоҕун барытын сырдата олороро — атын нэһилиэктэргэ бэртээхэй холобур. Онон кинилэргэ киирэн «ыалдьыттаан» ааһыҥ, үлэни-хамнаһы, олоҕу-дьаһаҕы сөптөөхтүк сырдатарга үөрэниҥ диэн сүбэлиибит.
Елена ПОТОЦКАЯ, «Саха сирэ» хаһыат, edersaas.ru
Хаартыска — Дүллүкү нэһилиэгин инстаграмыттан скриншот.