Дьүлэй нэһилиэгиттэн төрүттээхтэр түмсүүлэрин үлэтэ көхтөөхтүк саҕаланна

Ааптар: 
Бөлөххө киир:

Киин куоракка олорор тыа сириттэн төрүттээх дьон төрөөбүт нэһилиэктэригэр суолталаах элбэх үлэни ыыталлар.

Маныаха Таатта улууһун Дьүлэй нэһилиэгин дойдулаахтарын холобурдуохха сөп. Түмсүүнү уопсастыбанньык Иван Неустроев сатабыллаахтык салайар. Иван Гаврильевич түмсүү быйылгы сылга үлэтин номнуо саҕалаабытын туһунан бу курдук иһитиннэрдэ:

— Ороһуоспа кэмигэр, төһө да өрөбүл күннэр буоллаллар, Дьүлэй нэһилиэгин баһылыгын Олег Осиповы уонна баһылык солбуйааччыта Любовь Ефимованы кытта хонтуораҕа көрсөн, граннаах куонкурустары ырыттыбыт. Тыа хаһаайыстыбатын министиэристибэтэ тэрийэн ыытар тыа сирин кэлимник сайыннарыыга туһуламмыт бырагырааматын чэрчитинэн, нэһилиэги тупсарыы хайысхатын дьүүллэстибит. Дьүлэйдэр тыа хаһаайыстыбатын тиэхиньикэтин түмэлин (музей) бырайыагын докумуонун оҥоро сылдьаллар эбит. Сметатын, тас-ис көстүүтүн моһуонун оҥорууга Иван  Сыромятников  ылсан, 1 622 000 солк. суумалаах үлэни оҥорбут. Бу бырайыак былырыын оннуттан хамсыаҕын, үбүлээһинэ ситэри кыаллыбакка, хапсыбакка хаалбыт. «Быйыл 244 тыһ. солк. нэһилиэнньэттэн, спонсордартан, эбии кыттыстахха эрэ тустаах ирдэнэр баалга эппиэттэһэбит» диэн суоттанан олороллор. Бырайыак сметатын иһигэр быйыл субуотунньуктар, «Үтүө санаа» аахсыйатын чэрчитинэн турбут, оноһуллубут түмэл каркааһын үрдүн бүрүйүүтэ, буор, кумах, сиэмэн кутуута, тимиринэн күрүө, арка оҥоруулара киирбиттэр. Олег Дмитриевич солбуйааччытыгар өрөбүллэргэ докумуону ситэрэригэр сорудах биэрдэ. Кэлэр нэдиэлэ ортотугар Тыа хаһаайыстыбатын министиэристибэтигэр бырайыактарын көмүскүү киириэх буоллулар. Уопсай хамсааһыҥҥа Дьокуускайдааҕы нэһилиэк түмсүүтүн кытыннарыахтара.

Норуот көҕүлээһинин бырагырааматын чэрчитинэн быйыл нэһилиэк олохтоохторо киин уулуссаҕа Кыайыы искибиэрин тутуутун бырайыагын куйаар ситиминэн түөлбэлэринэн, ыалынан төһө сууманы кыттыһалларын быһааран, ахсынньыга докумуону толорон ыыппыттар. Онон нэһилиэк дьокутааттара, тэрилтэ салайааччылара эмиэ куйаар ситиминэн грант куонкуруһугар эбии үбүлээһини быһаарар, өйдөтөр үлэни түөлбэлэринэн, үлэ кэлэктииптэринэн ырытыахтара, үлэлэһиэхтэрэ.  Нэһилиэк үбэ-аһа кырыымчыга биллэр. Онон араас хайысхалаах уонна таһымнаах грант куонкурустара — эбии үпкэ-харчыга тиксэргэ төһүү күүс.  Дьүлэйтэн төрүттээх Николай Попов нэһилиэк уустарын пааматынньыгын оҥорууну толкуйдаан, анаан үлэлэһэ сылдьар. Ахсынньыга Дьокуускайга скульптор Ильян Павловы кытта көрсөн, бу боппуруоска кэпсэппиппит. Туора Күөлгэ тахса сылдьан, нэһилиэк бэтэрээннэрин сэбиэтин салайааччыта Елена Аянитованы кытта эмиэ көрүстүбүт. Онон пааматынньыктары оҥоруу эскиһэ, үбүлээһинэ быһаарылынна.

Маны таһынан, Евгений  Неустроев салайар бааһынай хаһаайыстыбатыгар сырыттыбыт. Евгений Викторович 45 төбө cүөһүнү этэҥҥэ кыстатан турар. Хаһаайыстыба салайааччыта: «Сыл тахсар оттоохпут. Ону таһынан, тустууга спорт маастарыгар кандидат уолум Георгий  менеджер Айталина Неустроеваҕа иллэрээ сыл үөрэммитэ уонна ол түмүгэр бааһынай хаһаайыстыбабыт кэскиллээх сайдар былаанын ааҕан-суоттаан оҥорон, ол былаанынан үлэлээн, олох абыранныбыт», — диэн кэпсээтэ.

Дьүлэйгэ быйыл кыһын үөрэппит оҕолорум Наталья уонна Юрий Турниннар аһы-үөлү уонна араас табаары атыылыыр маҕаһыыны аспыттар. Олох куорат таһымыттан итэҕэһэ суох оҥостубуттар. Сыаналара да удамыр буолан, Дэбдиргэттэн, Чурапчы улууһуттан Арыылаахтан тиийэ кэлэн атыылаһаллар эбит. Турниннар маҕаһыыннарыгар сылдьан, нэһилиэнньэни үрдүк таһымнаахтык хааччыйыыга үлэни бэркэ тэрийбиттэрин көрөн астынныбыт. Кыһыҥҥы айылҕаны көрө, сибиэһэй салгынынан толору тыына «Кириэс үрүйэтигэр» тахса сырыттыбыт. Тааттаҕа сырыы кэмигэр бокса тренерин Николай Бысыинныын улуус буоксаҕа федерациятын сөргүтүү туһунан кэпсэттим. Федерациябыт салайааччытынан Николай Местников бэрткэ үлэлээбитэ. Кини уурайыаҕыттан федерация салайааччыта суох үлэлээн кэллэ. Онон билигин уопсастыбаннай тэрилтэни иилиир-саҕалыыр сөптөөх киһини булуохха наада. Бу боппуруоһу Таатта түмсүүтүн актыыбын батсаап бөлөхтөрүгэр кэпсэтии таһаарбытым. Онно сөптөөх киһини көрдөөһүҥҥэ үлэ саҕаланна. Таатта улууһун түмсүүтэ Дьокуускайга аан бастакынан тэриллибитэ уонна улууска көмөлөһөр үлэни тэрийэн ыытар. Таатта түмсүүтүн үлэтин сүрүн өттө нэһилиэк түмсүүлэрин нөҥүө ыытыллар. Уопсастыбанньыктар сүрдээх элбэх үлэни ыыталлар. Ол эрээри үгүс өттүн дьон билбэт. Ол иһин нэһилиэк түмсүүлэрэ ыытыллар үлэлэри социальнай ситимнэр нөҥүө дьоҥҥо тиэрдэргэ үлэлэһиэхпитин наада.

… Ити курдук, Таатта улууһуттан Дьүлэй нэһилиэгиттэн төрүттээхтэр түмсүүлэрин үлэтин бэрт көхтөөхтүк саҕалаатылар.

Елена ПОТОЦКАЯ, «Саха сирэ» хаһыат, edersaas ru

Хаартыскалар Иван Неустроев тиксэриилэрэ

+1
0
+1
0
+1
0
+1
0
+1
0
+1
0
+1
0