Дьөккөҥҥө, Тааһаҕарга, Баппаҕаайыга, Лөкөчөөҥҥө оттонор ходуһалар ууга бардылар
Халлааммыт ардах уутунан улуустары араастык хадаҕалыыр аналлаах. Сорох улуустарга халлаантан таммах уу түспэт буоллаҕына, сорохторго хастыы да күн устата ыаҕастан кутар курдук күндүлүүр.
Холобур, бу күннэргэ Баппаҕаайы, Лөкөчөөн, Дьөккөн, Тааһаҕар нэһилиэктэрин эргин хас да нэдиэлэтэ устата тохтоло суох ардаабытын түмүгэр, ходуһа үксэ ууга баран, олохтоох суолталаах ыксаллаах быһыы-майгы эрэсиимэ биллэрилиннэ. Улуустааҕы суһал ыстаап миэстэтигэр тиийэн, үөскээбит балаһыанньаны көрөн-истэн баран, ууну түһэрии үлэтин ыытарга, мобильнай этэрээттэри тэрийэн ыраах учаастактарга оттуурга быһаарда.
Дьөккөнтөн Альбина Ионова: «Дьөккөҥҥө оттооһуҥҥа ыксаллаах-быһыы майгы биллэрилиннэ. Эбэ уонна Алаас диэн сирдэрбит ходуһалара уһун ардахтар кэннилэриттэн ууга бардылар. От ыйа саҕаланыаҕыттан хас да төгүл нэһилиэк хамыыһыйата оттуур ходуһалары көрдө. Улуустааҕы суһал ыстаапка бу туһунан туһааннаах докумуоннары киллэрбиппит түмүгэр улуус баһылыгын бастакы солбуйааччы Иван Иванович Евсеев, тыа хаһаайыстыбатын департаменын салайааччы Павел Павлович Иннокентьев, Бүлүүтээҕи мелиорация салаатын начаалынньыга Михаил Алексеевич Алексеев уонна улуус мелиоратора Анатолий Егорович Петров тахсан көрдүлэр.
Ыксаллаах быһыы-майгы биллэриллэн, мелиорация экскаваторын оптуорунньукка аҕалан, билигин Бэрэттэн Алааска диэри тиийэр хорууны ыраастыы сылдьар. Бу бүттэҕинэ Эбэ ходуһатын хоруутун ыраастыы кэлиэҕэ. Быйыл уһун ардахтарга эбии хорууну ЯТЭК тэрилтэтэ изыскательнай үлэни ыытаары бырасыаканы солоон, сорох сирдэрбит күрүөлэрин уонна хорууларын саба тарыйан уонна үлтү анньыбыта улахан мэһэйдэри үөскэттэ. Нэһилиэк быйыл 1453 туонна оту бэлэмниэхтээх. Бүгүҥҥү туругунан баара-суоҕа 7 эрэ туонна от кэбиһиллибит, былырыын баччаларга 20 туонна чөкөтүллүбүт, 60 гектар сир охсуллубут этэ. Уопсайа нэһилиэк үрдүнэн 500 ынах сүөһү уонна 468 сылгы кыстаан тахсар ото оттонуллуохтаах. Сүрүн оттонор ходуһабыт ууга сытар буолан, балаһыанньа сытыырхайда. Ону сөпкө өйдөөн, улуус суһал ыстааба экскаваторы таһааран, сөптөөх быһаарыныыны ылбытыгар махтанабыт. «Сайыҥҥы биир күн дьылы аһатар», — диэн өбүгэлэрбит мээнэҕэ эппэтэхтэрэ буолуо. Халлаан курааннаан оттоттоҕуна, кыстыыр оппутун ылыахпыт диэн эрэллээхпит» — диэн кэпсээтэ.
Тааһаҕарга эмиэ элбэх сир ууга барбыт. Нэһилиэк олохтооҕо Игорь Баишев Ойуун күөлүгэр охсубут ото, этэргэ дылы, уста сылдьар, үксэ тимирбит даҕаны. Ону видеоҕа устубут.
Салгыы видео-устуулары көрүҥ. Дьөккөҥҥө элбэх сир ууга барбыт.
Хаартыскалар уонна видеолар Дьөккөнтөн Альбина Ионова уонна Тааһаҕартан Игорь Баишев тиксэриилэрэ.