Бүгүн, ыам ыйын 26 күнүгэр, дьүкээгир норуотун литературатын төрүттээччи Николай Иванович Спиридонов — Тэки Одулок бюһун сүрэхтэниитэ «Сахамедиа» медиа-киинигэр буолла.
Тэрээһиҥҥэ бюһу оҥорбут скульптор Федор Марков, дьүкээгир норуотун аһымал пуондатын дириэктэрэ Валентина Акимова, дьүкээгир норуотун кырдьаҕастарын Сэбиэтин бэрэссэдээтэлэ Вячеслав Шадрин кыттыыны ыллылар.
Федор Марков, скульптор:
— Бу үлэҕэ ылсарбар бастаан икки эрэ хаартыска баара. Тэки Одулок Питергэ үөрэнэ сылдьар хаартыската баара. Суруйааччы эдэркээн мөссүөнүн, ону сэргэ кинигэ ойууларын көрөн, Валентина Семеновналыын, Вячеслав Шадринныын алтыһан оҥордум. Маныаха Аллараа Халымаҕа Андрюшкино дэриэбинэҕэ сылдьан хотугу норуоттар олохторун-дьаһахтарын көрөн олус туһаммытым. Хоту дойдуга аҕыйах ахсааннаах норуоттар олохторо туспа угуйар айылгылаах. Онон бу уобараһы айарбар, холонуубар тирэх, күүс-көмө буолбут дьоммор махтанабын.
Ульяна ЗАХАРОВА.