Бука бары Таанньалар
Эдьиий Таня,
Саҥас Таня,
Кийиит Таня,
Балыс Таня,
Сиэн Таня
Ыалым Таня
Дьүөгэм Таня
Элбэхтэриэн.
Бука бары талбыт курдук
Нарын-намчы дьүһүннээхтэр,
Көнө, үтүө майгылаахтар
Кэрэ дьоннор, Таняларым!
Ырыаһыт Таня,
Иистэнньэҥ Таня,
Уруһуйдьут Таня,
Оҕуруотчут Таня,
Тойуксут Таня,
Үҥкүүһүт Таня
Мелодистка Таня
Талааннарыан!
Киһи сөҕүөх кинилэр
Өссө хос-хос Танялар
Миэхэ чугас дьоннорум
Бука бары күндүлэриэн.
Бу хоһоон ырыа буолан ылланар. Матыыбын Татьяна Кириллина суруйбута. Бу хоһооҥҥо ааптарга сыһыаннаах аймахтар, дьүөгэлэр, чугас олорор ыаллара, бары талааннаах дьоннор туойуллаллар.
Татьяна Петровна Кириллина намыын матыыптаах ырыалары айар мелодистка, айар үлэтин 1979 с. саҕалаабыт. 1988 с. улуустааҕы “Туллук хаара”’ айар түмсүү чилиэнэ. Өрөспүүбүлүкэҕэ, улууска ыытыллар мелодистар уонна ырыаны толорооччулар куонкурустарын хас да төгүллээх дипломана, кыайыылааҕа, номинана. Татьяна Петровна үлэ бэтэрээнэ, СӨ уус-уран художественнай самодеятельноһа сайдыытыгар кылаатын иһин бэлиэ хаһаайына, 69 ырыа ааптара. Иллэҥ кэмигэр иистэнэр, баайар, туос иһити, ат симэҕин, кыыл-сүөл хабаҕыттан суумкалары тигэр, сиэлтэн оҥоһуктардаах.
Никифорова Татьяна Матвеевна 1984 сыллаахха СГУ саха тылын уонна литературатын салаатын бутэрбитэ, билигин олохтоох оскуолаҕа социальнай педагогунан улэлиир, РФ үөрэҕириитин Бочуоттаах үлэһитэ, «21 уйэ учуутала», «Хатын-Арыы нэһилиэгэ сайдытгар кылаатын иһин» бэлиэлэр хаьаайыннара.
Иллэҥ кэммэр үҥкүүлүүрүн, ас астыырын, тэлэбиисэринэн сериаллары көрөрүн сөбүлүүр.
Татьяна Прокопьевна Скрябина, Елисей Елисеевич Эверстовтар ыалым. Уоллаах кыыс оҕолордоохтор. Татьяна Хатыҥ Арыытааҕы Апреля Николаевна аатынан амбулаторияҕа биэссэр-лаборант. Татьяна Прокопьевна уус-уран самодеятельность көхтөөх кыттааччыта. Кэлэктииптэригэр баар ырыа, үҥкүү ансаамбылын кыттыылааҕа. Иллэҥ кэмигэр иистэнэрин, баайарын сөбүлүүр.
Дьүөгэтин Татьяна Дмитриевна Павлованы кытта 1972 с Маймаҕаҕа комсомольскай путёвканан үлэлии тиийэн баран билсибит. Татьяна Дмитриевна ССРС кинематографиятын туйгуна, Саха киинэтин бэтэрээнэ, үлэ бэтэрээнэ, Маймаҕа нэһилиэгин бочуоттаах олохтооҕо, «Нам улууһун сайдыытыгар киллэрбит кылаатын иһин» бэлиэ хаһаайката. Кини иллэҥ кэмигэр дьарыга үгүс. Элбэх значоктардаах, харчылар, араас кэмнэрдээҕи эҥин эгэлгэ бэйэлээх харыйа оонньуурдара, керосинынан умайар лаампалар, мэдиссиинэ тэрилэ, уо.д.а. араас дьиэҕэ туттуллар тэриллэр кэллиэксийэтигэр бааллар. Маны таһынан бастыҥ оҕуруотчут, араас отонноох мастары, сибэккилэри олордор. Бочуоттаах сынньалаҥҥа олоруоҕуттан ютубунан дьарыгын кэҥэтэн, араас матырыйаалтан сувенирдары оҥорор.
Кырдьаҕас эдьиийим Татьяна Спиридоновна Евсеева 2000 с. 75 сааһыгар күн сириттэн күрэммитэ. Сэрии сылларын оҕото буолан ыарахан үлэҕэ улахан дьону кытта тэҥҥэ үлэлээбит. Үлэ, тыыл бэтэрээнэ этэ. 1951 с Василий Тимофеевичтыын ыал буола түөрт оҕолонон, биир уол оҕону эбии иитэн, дьон оҥортоон улаатыннарбыттара. Эдьиийбит колхуос араас үлэтигэр ситиһиилээхтик үлэлээн үбүлүөйдээх мэтээллэринэн наҕараадаламмыта. Элбэх сиэн, хос сиэн тапталлаах эбээтэ этэ. Татыйыас чуор куоластаах ырыаһыт, иистэнньэҥ бэрдэ этэ.
Мальцева Татьяна Гаврильевна кыыстаах уол оҕолоох, хас да сиэн эбээтэ. Нам “коммунтеплоэнерго” гаас операторынан уон бэһис сылын үлэлиир. Кини намчы, ис киирбэх көрүҥнээх. Ыллыыр, лобзигынан дьэрэкээн оһуордаах оҥоһуктары, кумааҕыны кырыйан хартыыналары оҥорор, араас сиэдэрэй киэргэллэри оҕуруонан өрөр, баайар, олус бэрткэ уруһуйдуур.
Саҥаһым Лыткина Татьяна Гаврильевна эдэр сааһыттан үлэҕэ эриллэн улааппыта. Оскуола кэнниттэн Карл Маркс колхуоска субан сүөһү көрүүтүгэр үлэлээбитэ. Кэлин ыал буолан баран Хатыҥ Арыы нэһилиэгин Хатыҥчаана детсадыгар иитээччиннэн 28 сыл устата үлэлээтэ, үлэ бэтэрээнэ. Таня Диматынаан түөрт оҕоломмуттара. Кэргэнэ оҕолоро кыраларыгар хомолтолоохтук олохтон туораан, оҕолорун соҕотоҕун көрөн улаатыннартаан, ыал оҥортоон элбэх сиэн, хос сиэн эбээтэ буолан ыччаттарын ситиһиитинэн, өйөбүллэринэн дьоллоохтук олорор. Кини уруһуйдьут бэрдэ. Эдэр сылдьан кып-кыра аккырыыккаттан киинэ артыыстарын Алла Ларионова, Нелли Мышкова, Николай Рыбников мэтириэттэрин улаатыннаран уруһуйдаабытын, наһаа үчүгэйдик ыллыырын, убайбынаан дуэттыылларын өйдүүбүн. Билигин сиэннэрин көрөрүн быыһыгар иистэнэр, быысыбайдыыр.
Рожина Татьяна Гаврильевна (Лыткина) сиэн балтым. Таня Кешатынаан уол оҕолоохтор. Тверь уобалаһыгар Коломноҕа олороллор. Танюша эпидемиолог быраас. Билигин оҕотугар олорор. Кини эмиэ удьуордаан тарбаҕар дьоҕурдаах. Уруһуйдьут, асчыт. Торт оҥорор, полимернай туойунан куукула арааһын чочуйан таһаарар.
Мин бэйэм 1981с Марков Егор Елисеевичтыын ыал буолан, бочуоттаах сынньалаҥҥа тахсан олоробут. Кэргэним 14 сааһыттан механизатор, чөмпүйүөн тырахтарыыс, ыраах айан суоппара, бастыҥ сир оҥорооччу, үлэ бэтэрээнэ. Мин үлэ, сцена бэтэрээнэбин. Хоһооннордоох алта хаартыскалаах альбом ааптарабын, иллэҥ кэммэр айылҕа кэрэ көстүүлэрин хаартыскаҕа түһэрэн ыларбын, иэйэн хоһооҥҥо хоһуйарбын сөбүлүүбүн.
Мария Маркова,
Аппааны, Нам.
Хаартыскалар Мария Маркова тиксэриилэрэ