— Слушай, я вчера смотрела НВК “Саха”, и что ты думаешь? Поняла почти все, о чем разговаривают, у вас и названий месяцев то нет, оказывается, все как у нас — январь, февраль, март и т.д. А ты мне голову морочишь о том, какой у вас красивый и богатый язык, — диэн Айталыынаны нуучча дьүөгэтэ кыһыттаҕа үһү. Дьэ, абаран туран толкуйга түстэ уонна күрүө намыһахтыы саха тэлэбиидэнньэтигэр үлэлиир дьүөгэтигэр эрийэн тиийэн, нуучча дьүөгэтэ эппитин тиэрдээччи буолла.
— Нарыйа, эһиги ити эпииргэ таһаарар дьоҥҥутун арыый эрдэ сэрэтэн, ыйдар ааттарын, онтон да атыны чопчу ийэ тылынан кэпсииллэрин курдук бэлэмнээн таһаараргыт тоҕо сатамматый? Чахчы да истэргэ олус куһаҕан ээ, саатар ыйдар ааттарын сахалыы билбэттэр, аанньа ахтыбаттар дуу.
— Дьэ, сэгэриэм, итинник буолан хааллыбыт дии, хайдах гынан ийэ тылынан норуоппутун интервью биэрэргэ тиэрдэрбит буолла? Уустук уонна кыайтарара ыарахан буолла дэһэбит ээ. Хата, эн ийэ тыл көмүскэлигэр туруммут киһи сүбэлээ, итиннэ ыраахтан абара-кыһыйа олорума.
— Тыый, доҕор! Ол бүтүн өрөспүүбүлүкэ көрдөрөр-иһитиннэрэр хампаанньатын курдук улахан тэрилтэни миигинэн сүбэлэтэн үлэлээри гынныҥ дуу? Араас таһымнаах суруналыыстаргытынан балачча баай курдуккут дии. Бэйэҕит толкуйдааҥ, тобулуҥ. Хайа ийэ тыл эмсэҕэлиирэ диэн ыарыылаах, тыын боппуруос. Аҥардас ыйдар ааттарын билбэт буолбатахтар, сарсыардааҥҥы эт-хаан эрчиллиитин ыытар ыччаттар “илии, атах, төбө” дииллэр эрээри, илии ханнык чаастартар турарын олох арааран эппэттэр, бэгэччэгин эрийэ туран, илиибитин эрийэбит диир, ол аата тарбах төбөтүттэн саҕалаан санныгар диэри олоччу — илии, бэгэччэк, хары, тоҥолох, бүлгүн диэн араарыы суох, атах чааһыгар биир оннук. Чэ, итинниги буолунай этиэхпин-тыыныахпын сөп эрээри, ону эһиги тэрилтэҕит болҕойон үлэлиэ этэ. Ийэ тылбыт дьүдьэйэн, бокоорон сүппэтин туһугар.
edersaas.ru саайтка анаан Наталья МОРДОВСКАЯ — Уйан Кут.
Хаартыска: yakutmuseum