Быһыыны ылыы туһунан саҥа сэртипикээттэргэ QR-код, ону тэҥэ ревакцинация, быһыыны ылара тоҕо көҥүллэммэтин уонна ханнык ыарыыларынан ыалдьыбытын туһунан чахчылар баар буолуохтара. Доруобуйа харыстабылын министиэристибэтин анал бирикээһэ күүһүгэр сэтинньи 8 күнүттэн киириэҕэ, диэн Парламентскай хаһыат иһитиннэрэр.
Докумуоҥҥа пааспар чахчылара, аадырыс, СНИЛС, ОМС, ону тэҥэ бу киһи ханнык препаратынан хаһан уонна ханна быһыыны ылбытын туһунан сибидиэнньэлэр киириэхтэрэ. Ыалдьа сылдьыбытын туһунан графаҕа диагноһы хаһан туруорбуттара уонна үтүөрбүт күнэ-дьыла, ону тэҥэ пациент көрдөрүммүт эмп тэрилтэтэ суруллуоҕа. Маны тэҥэ сэртипикээккэ быһыыны ылбытын туһунан эбэтэр ыарыытын туһунан федеральнай реестртэн бэлиэтээһин нүөмэрин ыйыахтара.
Уруккутун курдук, бу докумуон госөҥө порталыгар тус кэбиниэккэ быһалыы оҥоһуллуоҕа. Эрдэ бэриллибит сэртипикээттэр түөрт ый иһигэр быһалыы саҥардыллыахтара. Кумааҕы куопуйаны МФЦ-тан ылыахха сөп.
Быһыыны ылара табыллыбатын туһунан чахчылар уонна итилэр дьайыыларын болдьоҕун сэртипикээккэ тута киллэриэхтэрэ суоҕа, бирикээскэ этиллэринэн, кэлэр сыл кулун тутар 1 күнүттэн эрэ.
СИА
Бэлэмнээтэ Женни Стрюкова
Хаартыска: тустаах саайтан